قصيده لابن رشيد الطرفاوي ومجاراةعمه لها

هذه القصيده للشاعر صالح حمدان رشيد قال فيها:
ياعظيم الشان ياوالـي المعـاش
تجمع ليومـك جميع الناس حـوش
يابديع الخلـق ماتخلـق همــاش
يامجيب لمن دعى رزقك يحـوش
تفرج لقلبٍ من الهوجاس جاش
مزدحم في ضامري سوى جيوش
كني المعلول طايـح بالفــراش
ينتظـر موته عقـله بـه وشـوش
أوكما اللي غاديٍ عظمه هشاش
منكسر عظمه وغـادٍ بـه هـشــوش
سبة اللي صابني جوى المشاش
وابتعـد والهـم في صـدري يـجــوش
له تواصيفٍ بشعري ما تحاش
ولو بغيت أوصف لزينه ما أحـوش
خده ابيض صافي لون القماش
مـاتـزيـن بالمبيـض والرشـوش
عين خشفٍ رابيٍ وسط الدشاش
يذبحك من نظرته بـس الــرموش
من نظر زينه يقول الحاش تاش
ما يـزينــه الكحل والا النــقوش
وراكب اللي مادخل وسط القراش
مصنعه معروف مـن تصنيع بــوش
ياصل المجمول مكحول الرموش
خــبره بالحال وللــي بـي يجـوش
مخطـرٍ أدخل بغـرفـات النعــاش
وانقتل فـي حب مكحــول الرمـوش
ولاهقيت الشعر ياتي من بــلاش
ولاهقـيـت ان الـمراجـل بالـقروش
ولابغـيت الـقيـل ياتينـي طفـاش
طوبـرن مثـل العـسكر والجـيـوش

قصيده للشاعر محمد الرشيد ( رحمه الله ) مجاراة لقصيدة ياعظيم الشان
راكب اللـي مـا يتخـثـع بالعـفــاش
لامشـى مـع سلــةٍ بالقـاع مــوش
حلو صوت الهوب مع وزن القماش
مثل صوت الزيــر لامنه يهـــوش
كـن مشـروبه مخـازيــن الغـراش
لانهمت الجمس من حدرك يهوش
وصله صالـح وقلـه مــا بـهـاش
لاشفت بعض الزين تجيني مخروش
لاوصلتوا حولوا وارمــوا الفـراش
خـبـره بالله تـراه مــغشـوش
النصيحـــه ياولد منـي بـلاش
لايغـرنـك تصاويـر الـدشـوش
ساقه اللـي خابــرٍ لذ الـفراش
عقب غـيبـه رايـحٍ لخـل بشـوش
ريح جيبه كالنفـل عقب الرشــاش
عـقب ست أيام تسـقـيه الـغبوش
لانظرت لــزينها جــاك الخراش
يوم تغضي بالحـواجب والـرموش
عين خشفٍ لـو تحوشه ما يحاش
جفله حـس المصـوت والنطـوش
رو معلـوق الضمير اللـي عطاش
مـن ثنايــا ذبـله يلـو نوش
وكان مقصودك تبي كثر المعاش
غير رزقك يالبناخـي مــا تحوش
وقال ابن رشيد هذه القصيده رد على عمه
راكب اللـي خف جنحـان الفــراش
وبويته تلـمــع ولا جتـه الخـدوش
وامش في سهلـة ولا تمشي عـفاش
لين تاصل عمي الغالـي البشــوش
حب لي راسه وخشمـه لـي عـاش
يحفظـه رب الفيافي والـوحـوش
وقلــه إنـي فاهمٍ مـابـي وشاش
لايحسب إنـي غـشيمٍ ومغـشوش
يوم ينصحني نصايـحٍ مـن بلاش
والنصيحـه قبل تسوى قـروش
له جـزيل الشكر من ضمـر عـطاش
وله كبير الحب في قلبٍ عطـوش
ماركـضت ادور زيـادة مـعاش
عارفٍ اني غير رزقي ما أحـوش
ولا دخلت الحب مـن باب الهـماش
ولادنت نفسي لمروض الدشـوش
مير موتي مـن صـوابٍ بالمشاش
من سهم عين ومن رمح الرمـوش
هو هـذاك الموت ياعـمي بلاش
هو هذاك صويحبي خـلٍ بشـوش
ارخص أيامـي وعـمري لـه بلاش
ولو يغيب شوي تلقانـي مخروش
هو هذاك اللي ترك عظمـي هـشاش
هوهذاك اللـي قتلني بالرموش
خده الصافي يشـابه لـون شاش
وعنقه اللي مثـل غزلان الدشوش
منـه أنا قلبي تلاعب به كلاش
في نهار الحرب بيديـن مخروش
هـو سـمي ٍللقمر يـاعـمي كاش
لاكتمل نصف الشهر مابه فقوش

وسلامتكم

مشكور على النقل وصح لسان الشعار
موفق بإذن الله ... لك مني أجمل تحية .

ماركـضت ادور زيـادة مـعاش
عارفٍ اني غير رزقي ما أحـوش


صح لسانك . قصائد جميلة جدا اشكرك

قصائد من العيار الثقيل

صحت ألسنة الشعار

وسلمت يمينك

منـه أنا قلبي تلاعب به كلاش
في نهار الحرب بيديـن مخروش
رحمة الله على الاموات
القصايد قنبله

رووعه ردياات روعه جزاله ابو رشيد الطرفاوي

تحياتي وتقديري

صـح السـآن الشعــآرٍ

وٍرٍحـم مـن مـآت

بـآرٍك الـآـه فـيك عـلى النـقـل

قصائد جزله من شعراء كبار
بارك الله فيك .... فقد استمتعنا بهذه القصائد الرائعة

تسلم على النقل

صـح السـآن الشعــآرٍ

وتسلم يمينك على النقل الرائع

مودتي