الشاعر : يوسف بن معطاب المسيعيد - لا يا وجودي وجد من جاه من جاه

الشاعر : يوسف بن معطاب المسيعيد


لا يا وجودي وجد من جاه من جاه
ناسٍ تخلّي كل مستور عاري

قالوا نديمك له مع العالم اشباه
وتحصّله موجود في كل داري

صيح عليهم يوم قالوا تناساه
قال اسكتوا يا مدوّرين العذاري

خلوني ادله زايد الهرج م ابغاه
ماله وصيف ب رغبتي واختياري

دوّرت بين الناس والدار وارجاه
ولا شفت بين البيض من له يماري

يا شيب عيني كل م اذكر حلاياه
ما اعده الا حور بين الجواري

يا ويل قلبي من عنا الحب ويلاه
غدى من اللوعات ماله قراري

على حبيبٍ يوجع القلب فرقاه
عن شوفته صد الهوى واستداري

ظبيٍ لمع ب اسراع والخوف جلّاه
ما كنّه الا بين سحم الضواري

ضاع وتخفّى م اعرف وين دنياه
جار الزمان وفرقتنا الدياري

تمر في بعض الصواديف ذكراه
وتطري علي من كل ذكرى طواري

واسرح مع الهاجوس لين آصل اقصاه
طريقٍ اسمح من طريق القطاري

يلعب ويشعب بالحشاء لين قسّاه
والله حسيبه قاسيً ما يداري

قبل اتشفّق له وفرحٍ ب لاماه
وافز له فزت سباق المهاري

لا فرّت الشقراء عطتهن مقفاه
ومن بينهن ثوّر عسام الغباري

خيّالها يلسب ظهرها ب يمناه
فنّان معروفٍ على الفوز ضاري

راحت فرَد ماعاد فيها مساواه
ومن الملك فازت ب شيكٍ وزاري

واليوم من كثرة خطاياه عفناه
واصبح من الفرقى يبيّن مواري

مغرور والمغرور شانت سجاياه
وانا عن الضايع طلبت استخاري

والحين سكّنت الحشاء عقب ما تاه
وعن لوعة الغفلة خذيت الحذاري

لا بارك الله بالهوى هو ومسراه
فيه الهجوس يضيّعن العماري

عاهدت نفسي لاترك الحب واجفاه
وامسك مسارٍ غير هاك المساري

والزم عبادة خالقي واطلب رضاه
واستغفر الله عن ذنوبٍ كثاري

واللي مضى يا رب طالبك تمحاه
مثل الظلام ليا جلاه النهاري

تعلم خفى عبدك وتعلم نواياه
واللي كتبته لـ المخاليق جاري

ولا ترى الدنيا محلٍ لفيناه
يومٍ براد ويوم تذري الذواري

اليوم جينا له وباكر تركناه
ما ندري انّا ندّي الاختباري

وانا زبنتك يوم ما ينفع الجاه
يوم القيامة بين جنة وناري

ناسٍ تروح لـ جنة الخلد ب اعلاه
وناسٍ تحوّل لـ الجحيم انحداري

انا اطلبك يا من رجينا بـ رجواه
انك تسلمني من الانكساري

انت ارحم اللي فاضت الدمع عيناه
من خشيتك يسجد جبينه اجباري

واللي يجينا منك حنّا رضيناه
لو الفتى لا مسّه الضر غاري

يا من ب عين العقل حنّا عرفناه
لا تجعل كتابي يجي في يساري

هذا وصلى الله على اللي تبعناه
محمد اللي للسماء راح ساري

اللي نقرب له ليا من ذكرناه
وصحح حديثه مسلمٍ و البخاري