سحابة مرّت

قصيدة مني لأهل القلوب الوفية ، والنوايا الصافية... تفضلوا

لاباس يا حر فقد لذة الحوم
مادام عز وللزمان انعواجه
وش عاد لو وقع على وكرك البوم
ما يستوي عذب الشراب وهماجه
تبقى لك العزة ولو كنت مضيوم
ولا قيل عز القوم فرخ الدجاجه
وقت يعز رخوم وينزّل قروم
لو مدته طالت ما شعشع سراجه
صعبة تعلم من تعوّد على النوم
لا قلت ذاك الدرب عقّد حجاجه
كم واحد وقت الرخا صار زيزوم
ولاجيت بالشدات غير مزاجه
دور على الطيب ليا صرت ملزوم
ينفع بضيقات الزمن وانفراجه
والوحدة أفضل من تخاوي لك رخوم
راع الردى ما ينفعك بأي حاجه
والعفن لو له مال قارون محروم
سعيه لغيره ما اهتنا في نتاجه
والكاذب اللي عنده الحق معدوم
احذره لو يقرا السنن وابن ماجه
سحابة مرت ولا سرت القوم
ما خلّفت غير السموم وعجاجه
لا ربعت قاع ولا لاحت غيوم
واللي عليه التاج ما دام تاجه
رجل تعزوى تحسبه قيصر الروم
ولا انكشفت الأوراق يصبح خواجه
خالف طريق السرب ما همه اللوم
ما اهتم للجرح العميق وعلاجه
من لا يقدّم حجته صار مظلوم
لا فات وقته ما نفعه احتجاجه
والمجلس اللي يكثر الهرج به دوم
ما ينقطع به حق وسط اللجاجه
دستورنا له عدة سنين مزعوم
بين الرجاء والياس وأهل العواجه
لا حد جاء من يعشق المجد ويروم
دعّم تفاسيره وحسّن اخراجه
ويا حر حلق واترك الوكر للبوم
ولا تلتفت لأهل الحكي والسذاجه

#خلف_المهدي

والوحدة أفضل من تخاوي لك رخوم

راع الردى مـا ينفعـك بـأي حاجـه

والعفن لو له مـال قـارون محـروم

سعيه لغيـره مـا اهتنـا فـي نتاجـه

صح لسانك وعلا شانك ابو سلطان قصيدة تستحق القرآة كل يوم لكي ينتفع بما فيها من حكم وفوائد .

لاتحرمنا من جديدك الله لايحرمك الجنة ويرحم والديك .

تقبل مروري ,,, ودمت بعز و معزة .

صح لساانك يابو سلطان وبيض الله وجهك

قصيده مؤثره و كلها حكم وتعلم اجياال

ونعم فيك والله يااخلف لك وقفاات مع الكل

ولا يحد ينكرها وعسى الله يقوويك ويوفقك

الله معكـ يابو سلطان

يعطيك العافية يابوسلطان وصح لسانك على هالشعر الجزل وفالك التوفيق



اخوك/ الســـــــاهر

صح اللسانك يابو سلطان

صح لسانك ... وعلا شانك

قصيدة مميزة وهادفة

وشتان بين القروووم والرخوووم

سجل اعجابي يامديرنا

صح اللسانك

اقتباس المشاركة الأصلية كتبت بواسطة الأطلس والوحدة أفضل من تخاوي لك رخوم راع الردى مـا ينفعـك بـأي حاجـه والعفن لو له مـال قـارون محـروم سعيه لغيـره مـا اهتنـا فـي نتاجـه صح لسانك وعلا شانك ابو سلطان قصيدة تستحق القرآة كل يوم لكي ينتفع بما فيها من حكم وفوائد . لاتحرمنا من جديدك الله لايحرمك الجنة ويرحم والديك . تقبل مروري ,,, ودمت بعز و معزة .

صح بدنك يا الغالي

وتعليقك وسام أتشرف به