انت السبب حطيتني بموقف احراج

موقف احراج

انت السبب حطيتني بموقف احراج
اخلفت هقواتي و خابت ضنوني

اما تبين لي على الحق مفلاج
و الا فلا يومٍ بكنك عيوني

جيتك و ابيك لجيتي عز و افراج
ما ابيك لاحتجتك تزود غبوني

ان كان ما انت بجيتي حيل محتاج
عندي ربوعي واجد اللي يبوني

لا صار ما انت لهاجسي طب و علاج
ابعد و لا تصبح سبب في طعوني

يا راكب اللي فاز في زين الانتاج
يسوقه اللي بالسواقه جنوني

ما بيع بالمعرض و لا طب كراج
و قنايته ما حسبوا للديوني

فيه انبساط و مركبه فلت حجاج
يرتاح فيه اللي بلته الشجوني

يفوت ما يسمع حكي كل هراج
ياقف على بيت الشرف لا يهوني

يقول عافت شاف بالوقت الازعاج
و الناس باسبابك غدوا يزعجوني

اما على الراس اركزوا لبست التاج
و الا اقطعوا حبل الوصل و اتركوني

قلته و انا همومي تزاحم بي افواج
واخوف لا تكثر علي الحزوني

شفت اختلافات العرب مثا الابراج
نوبٍ كمال و مرة ينقصوني

الشاعر/عافت الاميّر

احسنت وصح لسانك كلمات جدا رائعة