رساله الى مجلس الشورى

مريت من كثر المواقف بلاوي --- وعديتهن من صلب صدر العزيمه

ياشين درب ً طال فيني خلاوي --- ماغير اقلب في شهايد قديمه

لاجيت ادور للمواجع فتاوي --- لقيت في وجه النصيحه شتيمه

ليت السكوت ان طال يقدر يداوي --- والبوح في سر المناصب جريمه

وش عاد لوخابت جميع الهقاوي --- مبطي وانا احسب بين قيمه وقيمه

ماني على طمس الحقايق بقاوي --- والناس ماهي بالخفايا غشيمه

كم بيت من ظلم القرارات خاوي --- والبشت راع البشت جته الغنيمه

ان قلت نقسم رزقنا بالتساوي --- خذيت من كل الحواجز قسيمه

عشرين عام وكل ابونا رجاوي --- نخيل برق ً ماتجي فيه غيمه

كل يوم نصنع بالاماني حكاوي --- ونصدق الكذبه ولو هي نميمه

انجازنا تحليل هرج القهاوي --- والخير واجد من فضايل نعيمه

الحال نفس الحال والكل ناوي --- يبني مع الحرمان صحبه حميمه

صح لسانك غنمان

صح لسانك

قصيدة تحكي بعض الواقع المرير

شكرا لك

صح لسانك ياشاعرنا المبدع

كم بيت من ظلم القرارات خاوي --- والفاسد ينول بفساده غنيمه

ياكثر من بالش بوارد عراوي --- والغير يركب له مواتر وسيمه

قصيده جميله وجزله من شاعر جزل
صورت الواقع اخي ابو فيصل
لاهنت ولاهان منطوقك

احترامي

صح لسانك غنمان

قصيدة جميلة اخي غنمان تبقى مبدع رغم ماحولك من ابداعات تبقى جميل ترسم الصورة واضحة امامنا دون عناء لفهم ماتريد ان يصل الينا بكل سهولة
لك الشكر والاعجاب بكل المقاييس لماكتبت وماتكتب
ابوفيصل بارك الله فيك

صح لسانك .. قصيدة في الصميم

لا هنت أخي غنمان

وفقك الله وأشكرك على تميزك

مانقول إلا الله يعين