القناصة من جديد.. إصابات وقتلى في حوادث إطلاق نار***

بسم الله الرحمن الرحيم
السلام عليكم ورحمة الله وبركاته:
مساكم الله بالخير..
بصراحة يا اخوان اماكن الصيد صارت غير آمنة..
والوضع صار متأزم ومع تزايد الأيام تزداد درجة الخطر وتزود معها حوادث اخواننا القنوص ومثل هذه الأخبار تكون مزعجة دائماً وما نحب نتلقاها صراحتاً..
كل يوم يصير حادث اطلاق نار وشباب مصابين وآخرين توفاهم الله رحمة الله عليهم..
ياشباب ترى من الصعب تحمل نتائج هذه الحوادث
فمثلاً إذا صار الحادث اللي ماينصاب يحصل له من المشاكل مالا يتوقع فإجراءات التحقيق لاتعرف هذا صديق هذا وخلوه يروح للبيت لاوالله ترى بتبطي مارحت للبيت ويمكن تنسى معالم البيت بعد..ويمكن تصير مضاعفات للقضية نتيجة تدخلات الناس تصير قضية قتل عمد
حتى ولوكنتم أصدقاء..
شفنا كثير مواضيع مماثلة و بتستمر دام الوعي مفقود والجهل موجود..
يا اخوان ممكن نتجاهل بعض الامور احياناً وتكون هذه الامور بسيطة لاتمس حياة الأنسان..
كنسيان عزبة أو موية والا ناسي أغراضك قي البقالة ولا ماجبت البندف أو الرصاص..
هذه امور حتى لو تجاهلناها عمداً لامشكلة..

ولكن من يتجاهل حياته وحياة من معه للأسف هذا غارق في الجهل والمفروض يرتاح في بيت أهله فأهله ماهم في حاجة لمأساة لاسمح الله..


^^^^^


قصة جديدة للقنوص


يقول أحد الزملاء لي اليوم أن قبل اسبوع وبالتحديد عند دوار الحفنة إنطلفت طلقة من شوزن وأصابت من يركبون في المرتبة الخلفية في السيارة المنكوبة ولخطورة حالتهم استدعيت طائرة للموقع لنقلهم على وجه السرعة للمستشفى أعتقد قال إثنين أو ثلاثة المصابين ولا يعرف عنهم شيء لهذه الساعة ولكن وصف حالتهم بالخطيرة جداً..


طيب اخواني
تدرون ان الإنسان مايغلط بالسلاح غلطتين..ليش..
لأنه بيفارق الحياة من الغلطة الأولى فكيف يغلط ثانية..
حمانا الله وإياكم..
انتبهوا تكفون يا اخوان ترى الدعوى بسيطة أبق الرصاص خارج البندق دائماً ولامن شفت صيدتك ركبه ومن تبي تتحرك بسيارتك طلع اللي في البندق الحمدلله تدابير السلامة من أبسط الأمور ولاتآخذ منك وقت ولا جهد
ولكن إهمالها قد يكلفك حياتك
لاسمح الله



والحافظ هو الله..


في أمان الله
منقــــــول