قصيدة الشاعر الكبير : فهيد الباطح الجميلي ( رحمه الله ) في رئيس مركز هجرة أم رضمه : بندر بن عبار الشمري
من يوم طالعنا الحوايم تحومي .... يا حلو شوف البر عقب البلادي
طلـع سهيـل وبورحـنّ النجومي .... وذعذع يابو عادل هبوب البرادي
ايلول هـب وراح لفح السمومي .... وهـذي لـيـال مفرّقـات البوادي
الجـو تلقى في قطينه اثلومي .... كـلٍ يـدنّـي رحـلـتـه للـمـنـادي
شالت بيـوتٍ للمساييـر تومي .... بقى مشبّ اوجارهم والهوادي
اللي بمجلسهم تضيع الهمومي .... لا جيتـهم كنّـك بيـوم العـيـادي
يا عل يسقيهم سحاب الغيومي .... غيثٍ من المنشا يجيله احفادي
ديـمٍ علـى ديـمٍ وسيله قحومي .... نوّه حقوق وبالهوى الجو هادي
العشب من نبته يغطي الحزومي .... وتلقى بطرّاف الحروف الزبادي
فضلٍ من الرّب الكريم الرحومي .... إليا عطى عطاه يقضي المرادي
هذي طرات البدو رعي الوسومي .... الـلـي نحاياهم وسـاعٍ بـعـادي
نتذكّر الماضي سـوات الحلـومي .. وتبقى السوالف يابو عادل جدادي
يا بنـدر العبّـار جعلـك تـدومـي .. يالحر الاشقر في ليال الهدادي
اللي على جول الحباري جزومي .. يطلـع على الحبـرو كبير الثنـادي
مثلك يابو عادل بوقت اللزومي .... تصعد على العليا بعلمٍ وكادي
يالليث ياللي من رجـالٍ قرومي .. اللي لهـم هيبـه وعلـم ومـقـادي
زحول الرجال اللي تعرف السلومي .. ملجا لمن حدّه من الوقت حادي
ادناهم اللي باللوازم يقومي .... لا صار ولد اللاش ماهو جوادي
نفسك لجزلات المراجل تشومي .... تامر على درب الهدا والقوادي
ما تستمع لـمكثّرين العلومي .... اللي سوالفهم بهمق ودوادي
راسك عن العلم الرّدي معصومي .... والفايل ابيض ما يجيه السوادي
عند المعزّب غاليٍ ومحشومي .... وعن الردوف ملّوحٍ بالشدادي
ما يدرك الطوله ردي العزومي .... ما قدّموك إلا عليك اعتمادي
الله يوفقك السعد كل يومي .... يقداك ربّ البيت وآل العبادي