[align=center]السـلام عليكم ورحمة الله وبركاته
مساكم الله بالخيـر جميعـا .
هذي قصة عجوز الخير من قوم بني هلال .هي عجوز ولكنها شاعره وما يجي منها الا خير وماعمرها اوذت احد ولا سبت احد
يعني كل افعالها خير بخير وعشان كذا سميت بعجوز الخير . توفى زوجها ومابقى عندها الا ولدها عمره مابين الـ 12 سنه إلى 14 سنه
توه صغير وعجوز الخير صار لها مده طويله ماكتبت قصيد ولا قالت حكم وقال امير الديره لـ اخوياه عجوز الخير ماقصدت ولا قالت شي من زمان
شلون نخليها تقصد المهم نبي نسمع منها شي
قال واحد من اخويا الامير ياطويل العمر الشاعر مايقصد الا بحالتين
قال الامير وشو الحالتين .. ؟ قال خويه اما ان يكون مهتوي او اما ان يكون مجروح
قال واحد هذي عجوز كبير مستحيل انها تهتوي ولكن نجرحها
قال الامير نبي نجرحها شلون .؟ قال خويه نبي نمسك ولدها ونسجنه ونقول عليه قصاص .
وبعدين يطلع كل اللي بها
القوا القبض على ولد عجوز الخير . وقال الامير لخوياه لاحد يعلم بالشي اللي صار ولكن كل واحد يقول لزوجته اللي صار بينه وبينها
عشان يطلع الكلام من الحريم مهو من عند الرجال ..
وكلن راح لزوجته وقال لها اللي صار والحريم وصلهن الخبر بينهن لين وصل العلم لعجوز الخير
راحت عجوز الخير لـ الامير قال ياطويل العمر .. لا خدن عجيب ولا رحمن يجيب
قال الامير وش تبين ياعجوز الخير قالت ولدي مسجون عندكم تبون تذبحونه وانا ماعندي غيره ..
قال منهو ولدك . قالت فلان قال الامير ولدك محكوم عليه بالقصاص ولازم ننفذه لانه مجرم
قالت حده علي بالمال . ضحك الامير عليها قال انتي فقيره مره تغدين ومره ماتغدين
قالت عجوز الخير ماعليك انت حده علي بالمال واترك الباقي علي ..
قال اشتري ولدك مني بـ تسعين ناقه فتات ماعلق بهن شمال قالت قبلت
ونخت رجال من رجال القبيله فيهم خير قالت نبي نروح لـ زيد العجاج ابن مانعربالجنوب
هذا زيد رجل كريم وفارس والكل يعني له . وراحت لزيد العجاج ابن مانع وهو يسمع بعجوز الخير ولكن ما شافها
وصلت له بعد مسافه ثلاث شهور
واول ماوصلت له ارسلت له رجل من اللي معها وقالت له قل لزيد عجوز الخير تبي تسلم عليك
وراح الرجل وسلم على زيد وقال له عجوز الخير تبي تسلم عليك
قال زيد خلها تجي حياها الله . ودخلت عجوز الخير على زيد العجاج ابن مانع
ويوم جت عند توريدت السلام قالت
يازيد يازيد العجاج ابن مانع ... ولدي مطلوب(ن) علي بمال
مطلوب علي بتسعين ناقه ... فتات ماعلق بهن شمال
رد عليها زيد يقول :
ياعجوز الخير تعشي وامرحي ... والصبح يبدل الله حال بحال
ردت عليه عجوز الخير تقول :
اخير البر يازيد عاجله .... ومن زال عن وقته يصير سؤال
فأنحرج زيد وكلف ثنين من الرعيان كل واحد يجمع تسعين ناقه من اللي قدام البيت واللي ورى البيت
وراحوا وخلصوا كلهم سوا وجوا جميع وكلن يقول خلصت ياطويل العمر
قال خلصتوا كلكم. قالوا ايه : قال عطوها 180 ناقه
واخذتهن وقالت لرجالها يألله مشينا لاهلنا
قال واحد من رجالها ياعجوز الخير نبي نريح وبكره نمشي قالت امشوا الحين عشان اذا طلعت الشمس وشافوا الحلال يصيرالحلال غالي بكبود اهلها
ومشوا وبعد مسافه ريحوا ونامو لين الصبح وكملوا وجوا بعض الرجال يتكلمون على زيد العجاج ابن مانع
واحد يقول انت ماتخاف الله يوم جتك العجوز عطيتها 180 ناقه واللي يقول ليه ماعطيتني يوم طلبتك المهم الرجال تضايق
واخذ سيفه وفرسه وراح يبي يرد حلاله
ولحق عجوز الخير ويوم شافته وقفت له بنص الطريق قالت له
يازيد يازيد العجاج ابن مانع ... تحسفت وإلا حسفوك رجال
تفاجأ بالبيت الشعر واستحى ورد عليها يقول :
لا والله جيت ابعطيك سيفي ومهرتي .. عشان يجيك ولدك خيال
قالت عجوز الخير ايه هذولا انتم يالرجال
ردت عليه تقول :
كلكم سوا لو المعطات بينكم ..... تفرق رجال عن مقام رجال
واخذت سيفه ومهرته ورجل مشي
ورجعت لديرتها قالت للامير هذا اللي طلبت وطلع ولدي
قال شـلون جبتي كل المال هذا وعلمته بالسالفه ..
قال الامير لعجوز الخير ابسألك سؤال قالت وشو . قال انتي قلتي بأول شي لا خدن عجيب ولا رحمن يجيب وش معناها .؟
قال انا ماني مزيونه عشان ياخذوني الرجال ويعوضني الله يولد غير ولدي . ولو يتزوجني احد واقفه عن الضناء رحمي ما يجيب
قال دام كل هذا طلع منك اخذي ولدك والمال لك
وطلع ولدها بعد فتره وصار هو امير الديره
وسلامتكم
هذي القصه رواها الشاعر الراوي / خلف بن مسيعيد الحفر الجميلي
ودمتم بخيـر
،،[/align]