الشاعر : سعد العويد
من عاش بالحيلات يبشر بالفقر
مايكسب الطولات رجالٍ كذووووب
الصدق ينجي والعمر سكة سفر
والشمس تطلع لو تقفاها الغروب
والادمي لاصار في راسه سطر
مايفتخر بأفعاله بهرجة قروب
البوم لو حطوه في عال الوكر
ماهو مبشر بالعشا قبل الغروب
اليا قنصت إقنص لك بمخلب صقر
واليا تعزويت اعتزي لك بمحسوب
لاتعتزي في لاش وقصيّر شبر
حبل الردا لو طال مايستر عيوب
واليا وردت اورد على طيّب مقر
هداج حزات المواقف والوجوب
واحذر من مخاوا قليلين الصبر
اللي تزعلهم طويلات الدروب
وابعد عن النمام والوجه الودر
اللي يجيك بثوب ويروّح بثوب
تراه لاوكد خمالك ماستر
لوماعليك ذنوب يصنع لك ذنوب
خذ من تجاريب الحياة اكبر عبر
العمر مثل الملح بالدنيا يذوب
من يسمع الاخبار يلقى له خبر
صناعة الفتنة سبب كل الحروب
وعلاج ضيق الصدر ماهو بالابر
سج القدم بالارض طبٍ للقلوب
كم واحد طاحت عزومه وانثبر
والناس بالطولات غالب ومغلوب
من لاتعزوى بالمعالي ماقدر
أصنع لنفسك شي بالكون الرحوب
المجد بين الناس ماهو بالكبر
تواضعك طيبك يخليك محبوب
ان طاب حظك صار لك شان وقدر
واليا تردى يلفحك صلف الهبوب