الشاعر : يوسف بن معطاب
كثرت على قلبي علومٍ تروح وتجيه
متخفّيه بالضلوع ولا هي ب ضافيه
ما اكل ولا اشرب وحتى النوم ماارتاح فيه
عايش ولا ذقت لا صحّه ولا عافيه
مثل اللذي بالبراري خالياتٍ يديه
ما حوله ازوال .. يمشي والقدم حافيه
طالع ودوّر ودك القاع في ركبتيه
يقول ماني ب سالم من تكسّافيه
يصيح يا ناس .. ماله صاحبٍ يرتجيه
من عقب ما هو يحسب ان دنيته صافيه
وقّف وراقب .. وغنّا .. والتعب مغتشيه
من صمّ قلبه يجر الصوت والقافيه
هذي علومٍ تجيني والقصيد ابتنيه
بيوت متوازنه ما هي ب متنافيه
والشعر ودي ب تركه مير قلبي يبيه
يخفي لي البيّنه .. ويبيّن الخافيه
ناخذ ونعطي وبه نختار ما نشتهيه
درٍّ ثمينٍ ومنه نطلع الوافيه
نسمع جزيل الكلام وطايحه ما نجيه
لذايذٍ للغلايل والمرض شافيه
اما المراجل تبي عقلٍ فطين ونبيه
ما تبغي اللي عيونه دايمٍ غافيه
مهذبٍ كل فعلٍ طيبٍ يهتويه
ما يقرب اللي بها المنقود والهافيه
وجهه بشوشٍ يونّس طيّبين الوجيه
كريم.. منه الضيوف تروح متعافيه
ما هو خويّ الكرم الا بن امه وابيه
فزّه .. وفزعه تجيك ب عز متقافيه
ما ودّه انه يكون الا كريم ونزيه
خيره وشرّه يكفّه .. والفتن طافيه
يبعد ولا يقترب ل المختلف والسفيه
عنده من اهل النمايم طاقةٍ كافيه
يا شيب عيني من اللي بالجهاله يتيه
يطيح بالنار ويحسب انها دافيه
اونس لهبها وحسّ ان الجمر يشتويه
يقول يا ويل روحي من تصرّافيه
تعبت من كثر قولي ويش هو له وليه
ابا اتحسّف ولا ينفع تحسّافيه
يا وين احصّل ضميرٍ سالمٍ واشتريه
ضميري اصبح جريح وسبّب اعجافيه
ماهو ب صابر ولا هو مدّي اللي عليه
ما حصّل العافيه .. ومبيّد اكتافيه