الشاعر : غانم العريفج
تجمعٍ ما هو على هبت الريح
جمعت هله ماشوف فيها وناسه
لا صار ما اللمه مثل ريحة الشيح
وتزول عن راس المعنى عماسه
اخير منها روحة ٍللصحاصيح
في خايعٍ ماحد من البدو داسه
ومعك الرجال الصاملين الطحاطيح
كلٍ يحده للوفا طيب ساسه
من سلمهم ذبح الحشو والمفاطيح
وكعامة المخطي اليا طاش راسه
اهل الوفا روس الرجال الزحازيح
روس تروس الروس وأهل الرياسه
قول وفعل ماهي سوالف سلاتيح
صلفين قوة باس فيهم فراسه
لاحاول المخرم تضيع المفاتيح
وده يفصل لبسهم من لباسه
منهم يشوف احيان بعض التصاريح
ويمسك بريك وينتبه للحراسه
خلك سماء ضمن الرجال المفاليح
من طاوع الشيطان قطه وداسه
ولا قيل لك مخطي ماهو لازم تصيح
الحق يفلج ما تفيد الدساسه
قم وتوض وصحصح الوضع تصحيح
الخيره احسن من كلام النجاسه
وارجع لربك واستخر قبل لا تطيح
من عاند اهل الحق يعلن افلاسه
منته لحالك من بعاد المشاويح
قبلك رجال العرف وأهل الشراسه
وابعد عن وجيه الخبول المشافيح
واخس شيٍ بالفهيم انتكاسه
يزهى الرجال الكفو كثر التماديح
والعفن لو كثر به المدح حاسه