يا مسندي واركب اللي لا نهمته سبوق
جيب ينومسك لا منك نويت طرقه
من يركبه لو يطول الدرب لازم يروق
اللي مصممه عن كل الجيوب فرقه
لونه كما الثلج به لمسات فن وذوق
علامته دايره فيها حلقه وحلقه
فكسار من صممه طبع عليه الحقوق
متمرس بالصناعة كل فن طرقه
ليا ركبته لا تخشى بالزمان مخلوق
إلا الذي كل شي بالحياة خلقه
أركبه وأوصل كلام من ضميري يلوق
هات القلم قبل تنسى واكتبه بورقه
وصله للي يظن إني لقربه شفوق
اللي بكل المجالس له حكي وقرقه
سلمه في يده عله من منامه يفوق
اللي ليا جاك بالمجلس تجيه طفقه
لا يحسبنه ليامن غاب ضاق الخفوق
والله ما نفقد إلا كثرة النقنقه
من طال راسه على أصحابه وناظر لفوق
لابد ياتيه يوم فيه يلوا عنقه
ياما دريت الخواطر لكن العوق عوق
الطيب لا صار بالخايب يزيد حمقه
أغضي واسامح ولو يخطي علي معتوق
لكن أشوف إن راس العير فيه نهقه
الاحترام إن ما شكل حول الأصحاب طوق
ما تجني إلا شتات الجمع والتفرقه
كل يقفي وقلبه ما بقى فيه شوق
إلا الضغاين تعل القلب وتمزقه
أقفاي شمس ما ترجي من وراها شروق
لا هيفت للغروب وغيبت بشفقه
ما احد على أحد يعيش وفيه رب رفوق
كل يعيش بحياته والولي يرزقه
#خلف_المهدي