لي بكار مفختات و يذكرنّه
ابدورهن عسى بالامر خيره
رحت انشّد مير عنّي خالفنّه
ولا عليه وسم مع ذود العشيره
بكرتين و تشتبه باوصافهنّه
و كل منهن في وصايفها نظيره
و صعَبات و كلهن ما عسّفنّه
عنسن بالسن ما فيهن صغيره
حيل عنس و الجمل ما قاربنّه
ولا يعرفت البعير ولا هديره
و المدوّه لو يدوّه ما يجنّه
وصفهن معدوم في شبه الجزيره
من نظرهن في عيونه يخلفنّه
يختلف رايه ولو عنده بصيره
ما علي ان كان حظي جابهنّه
اختفن و علمهن ما جا بشيره
علمهن مع واحدن جابه و كنّه
حاسني بالعلم حاس الله مريره
وصفهن واحد و مختلف اسمهنّه
نقد ولا حكم و افطن لتعبيره
فسرو ما قلت كلن حسب فنّه
و اركدوا يا اهل العقول المستطيره
ابجدي و حروفها ما يجهلنّه
و الخبر ماكود و انواعه كثيره
يا الملا كان ابن عمك تحنّه
يا سعد علمك ليا جاني بريره
يا السنافي يوم احطك لي مظنّه
خابرك ما تجهل الطرق العسيره
و انت شاعر و الشعر ما تستمنّه
لا تطولها نبا الدعوى قصيره