هذه القصيد للشاعر الكبير/ فهيد الباطح رحمه الله يمدح فيها فخذ الطواله من قبيلة شمر

هذه القصيدة للشاعر الكبير/ فهيد الباطح الجميلي رحمه الله
يمدح فيها فخذ الطواله شيوخ الاسلم من قبيلة شمر

يقول من ولّف جوابٍ وقاله .... مثل السهوم اللي تصيد النياشين
واخترت من زين الدلايل اثقاله .... ذكرٍ لعلم الباديه والقوانين
وجدت لي ناسٍ تحب العداله .... اللي دلايلهم على منهج الزين
واليوم كلٍ صار شيخٍ لحاله .... يزمر ويطلع له رجالٍ كثيرين
يحسب الشيخة بكثرة حلاله .... يقول كل الناس عندي مهم شين
يموت ما حصّل بعمره جماله .... والناس عنه وعن نواله غنيين
ما يحسب ان الكذب عيب وعذاله .... والصدق يطلع شاهده لو بعد حين
لا يعجبك زينه وسنحت خياله .... تغتر به ناسٍ مهم عنه دارين
ومن شاع صيته فايله جاء قباله .... الفرق واسع والذهب له ميازين
الناس تدري ما عليها جهاله .... بروس الحمايل والشيوخ القديمين
مثل النعيس اللي بصدق وصماله .... والّا من المدلول عز المضاعين
والا حجاب اللي منارة دلاله .... بيته كما الهضبا يلم الدياوين
ان جيت ابو مروي عسى الخير فاله .... واخوانه اللي بالملازيم جزيلين
والّا مشل اللي فذايذ فضاله .... مثل النهر للمجتمع بالبساتين
حرٍ تخلّف بالمواقف عياله .... مدرباتٍ للهدد عقب تمرين
من هدّه الصقّار جاب العشا له .... صيارمٍ ما هي تبوع الشياهين
ما يجمّعون اموالهم بالبقاله .... بسط الصحن والا عطاً للمساكين
ادناك بدنا اللي يسرّك قباله .... يقضى لزومك ما وصلت المسمين
يا علهم ما يذهبون الطواله .... حيث انهم من كل خيرٍ قريبين
ريف الضعيف ليا تبيّن خماله .... مثل الرصيد اللي عن الفقر تامين
كلن يتابع سلم عمه وخاله .... عنابرٍ بسلوم اهلهم معيين
اللي بهم وصل الرّحم واتصاله .... هذي عوايدهم على العسر واللين
اللي يزاود فعلهم من اخباله .... ناسٍ بسلم اجدودهم مستقيمين
شيوخٍ ما شيختهم بشوت وضلاله .... يحشم بحشمتهم رجالٍ بعيدين
ما هي شيوخٍ رفّعت بالطاله .... صديق للصاحب عدو المعادين
يطمّنون اللي براسه صعاله .... ويسنّعون اللي عن الدرب غادين
ويورّدون اللي قصارٍ حباله .... ليا صار يوفي راعي الدين بالدين
ليا زبنهم صار مثل الدخاله .... همّه قضى لو كان يطلب ملايين
غيثٍ ليا قامو صدوقٍ اخياله .... مثل حقوق الوسم من وبل تشرين
وش رايكم يا مدركين الجماله .... كبار الوجاه مطلّقين المساجين
ياما وياما خلّصو كل قاله .... ولاهم بصعبات المواقف خفيين
الله يوفقهم بعزة جلاله .... في جاه من له يركعون المصلين
صلوا على المختار راع الرساله .... اللي بدينه وضّح الحق والدين

صح لسانه الشاعر الكبير فهيد الباطح


وعسى الله يرحمه ويغفرله