هذه القصيده للشاعر : عبدالعزيز المحارب الجميلي
يمدح فيها الشيخ : فلاح بن شرشاب الغنيم الجميلي
-- شيخ قبيلة الجميل --
يالله طلبتك حقق آمال حلمي
رجواك يالله ساعة الحر بظلال
واجعل طموحي مجلس الطيب همي
اهل المكارم والمثايل والأمثال
ياللي حضرتوا لقّو البال يمي
شعرٍ بقوله يذكره جيل لأجيال
من حشمتك يا شيخ انا جبت عزمي
الشاهد الله كلمة الحق تنقال
اسمه فخر فيه الطويلات تسمي
ابو مبارك طيب الساس والفال
شيخٍ موثق في رضا الكل رسمي
قوله فعل عند الصعيبات حلال
يحق لك يا رايه العز ومي
الطيبه نوماسها طيب الأفعال
كفو النعم تستاهل عيال عمي
اللي لهم في قمة المجد منزال
يا عزوتي عزن تغذاه دمي
شربت منه بدلة العز فنجال
كبيرنا ضاري على الطيب نشمي
وصغيرنا وقت المواجيب رجال
وعاداتنا درب الكرم ساس سلمي
عيال جامل حزة الوقت لامال
ودخيلهم يزبن عن عداه محمي
زبن السعد مزبن زحازيح ورجال
كم من عدون بالملاقات مرمي
وكم من صويبٍ نتركه لاشهب اللال
واللي سلم مع هفة مقيط علمي
إخوان سلمى للمعادين سلال
ما قلت دل وزبدة الهرج تمي
نعمٍ بكم وقت الشدايد لي ظلال