مقناص سوريا مميز

احب ان اقدم لكم تقرير عن مقناصي الاخير في بلاد الشام (( سوريا))

الرحله كانت من البحرين الى سوريا عبر السيارات

بعد الوصل الى ارض المقناص في وقت متأخر من الليل حوالي الساعه 12

تم تجهيز الاجهزه وعدة المقناص بصفه عامه

وفي اليوم الثاني كنا ننتظر احد الشباب السوريين وهو يعتبر الدليله في الارض

بس انا ومعي بعض الشباب لم يهنا لنا الانتظار

قلت للربع انتو انتظرو الرجال وانا راح ادوج وبيني وبينكم الجهاز

وهذي صورة احد الوديان الرمليه في القاع اول مادخلتها وكانت محريه بالصيد والخير

كانت الارض كلها اثري ارانب بالخيال اول مره اشوف ثريها بالكثره هذي
والحمدالله بعد حوالي متين متر تنفج منا سلفع مقلوعه والحمدالله الله وقفنا وصدناها
وهذي بداية الخير ان شاء الله

لابد من اخذ بعض الصور مع المزيونه جماعيه

وبعدها تحركنا من محل مصيد السلفع ومتحرين الخيرو الصيد

وانا ماشي قال خويي اللي على يميني ارجع يابوعلي والله مدري جرت حباره ولا كراوين ارجع خلني اتاكد منها
وانا على طول ماصدقت خبر رجعت ريوس ولاني اشوف هالمنظر اللي يسر العين

بعدها ركزنا على محلاتها وحراويها الكروين بين الحصى او في طرف الوديان والمسايل
ولكن ما الله قسم نشوف منها شي
وحل وقت المضحى
وقال واحد من اوخواي يابوعلي خلنا ننتظر اخوينا يجون
وبعدها ننتشر مع بعض يكون افضل

وتم اختيار الموقع وكان في احد الوديان الرمليه وكان الجو بارد

وهذي بعض الصور في المضحاه في انتظار الموتر الثاني

لابد من فنجال يطرد العمس من الراس ويزين الكيف

بعد ماتقهوينا وعينا من الله خير

صوت علينا واحد من اخوينا بوعلي عطني احداثيات محلكم
وبعد ماوصلو اخوينا انتشرنا للكراوين

وبعد دوجه بسطه والا خويي يقول يابوعلي ابشر به الكروان شوف العين
اصفر العرقوب
رديت عليه كم واحد قال والله اللي اشوفه واحد بس يمكن معه ثاني ولا اكثر الله وعلم
وعلى طول توجهت صوب اخوياي والا الحبيب مخشب ومستعد للمناوره شكله مسحب طيور واجد من قبل

صوره من زاويه ثانيه

الحبيب حس بالخطر وزادت تحركاته

كنت انا اصور الكروان والربع يدورن اذا فيه شي معه
والا يوم صوت علي خويي قال بوعلي تعال حذ لك قم صوره حق الميت هذا اثرها ثنين مع بعض بس بعيد من خويه

عينه عين الشجاع

وبعد ما اكتفينا من التصوير ندخل في الجد وسم بسم الله
جاك الموت يالحبيب

نكتفي بهذا القدر من التقرير ونلتقي معكم بكره ان شاء الله
ونكمل معكم التقرير
اسف
تحياتي لكم

*************

الحلقة الثانية

الله يحيكم ياخواني

نكمل معكم باقي الرحله

قلت للربع اللي في السياره الثانيه انتو طيرو الكروان وانا جاهز للهدد
وبعدها الربع ساقو على الكروان وخرشوه خرش طيب
وعلى طول هديت عليه الفرخ وساعه شاف الطير خر يبقي القاع
ضاقت عليه السماء زبن القاع والطير ما كان حمش عليه بالمره
على طول الطير ارتفع وقام يروج على السياره
وفي هذي الاثناء صادف ان الطير تلمع في عيونه حمامة دحل
وعلى طول طلبها وروح على ثرها والمسافه اللي كانت بين الطير والحمامه حوالي
300 متر وبعدي عليه لحق لحوق طيب ما شاء الله
لين زبنها دحلها والحمدالله انها بينت لنا الدحل ولا كان بوعلي في وسط الدحل
والسبب ان الدحل متساوي مع الارض
والقاع تغريك على الطرد الساتر الله

وهذي بعض صور الدخل الله يستر على المسلمين منه

وهذي صوره من بعيد تبين الطير في وسط الدحل

وسبحان الله الدحل كان عميق عمقه حوالي 40 متر تحت
والطير واجه صعوبه في الطلوع قام يلف على الدحل حوالي 5 لفات الين طلع
وبعد ما قبضت الطير ناديت على الربع
قلت اربكم ثابتينها رد على واحد من الربع قال يابوعلي
تعال واعلمك بالعلوم كلها
و اول ماجيت الربع قلت خير عسى ماشر قال تشوف يابوعلي اللي اشوفه
وساعة ناظرت محل ما يشوف خويي ولا ني اشوف الكروان اللي هديت عليه معه فرخ صغير ما يطير يدرج
وقالو الربع والله انها حرمت من بعد هالمنظر خلوها تربي فروخها

وبعدها قررنا نغير مقناص الكراوين الى مقناص ارانب

وانتشرنا في القاع ندور العدن وكانت القاع فيها الارانب كثيره يعني لو تبقي تصيد حتى 10 في ساعه تقدر من كثرها

ولا يوم صاح خوينا في الجهاز جاتك نفيج يابوعلي صور ترى هدينا عليها السلقه

وهذي صورتها وهي نفيج قدام الموتر

وبعد تطرد ممتع وضحك على السلقه لعبت فيها الارنب لعبة السبله لنها كانت بروحها ما معها كلب ثاني والقاع فيها حصى كثير
وفي النهايه استدحلت الارنب في غار وصعب انك تطلعها منه

هذي صورة السلقه بعد الطرد وعزالله انها شافت ما تكره

وبعدها انتشرنا ندور غيرها من الخير والارانب ولا ابعدنا من محل خويتنا اللي استدحلت
ولا يوم انفجت مني الارنب وايصح على الربع في الجهاز هدو السلق تراه نفيج قدامي والقاع سهل ورمل
والربع على طول الله يهديهم ساعة صحت عليهم قلت هدو رموها من السياره وتعثرت ولا شافت الارنب وحاولت اردها لها
لكن ابعدت انا ويها وخليتها في حال سبيلها

وبعدها صافنا رعيان يتقهون شاي

ونشدهم واحد من اخوينا عندهم طليان للبيع وقال الراعي حولو شربو شاهي وبعدين اللي تبون حاصل ان شاء الله
وبعدها حذنا منهم هرافا اثنين

وهذي صورة الهرافا ((وسام )) يصلح ضنك للقدرالضغط او قصدير وشوي وشرايك

وهذي صورة الحبيب الثاني قال واحد من الربع انا ابقي هذا وانتو احذو الثاني خلوني انا وياها لحالي

وفي اليوم الثاني قال خوينا دام انك غيرتو مقناصكم وتبقون ارانب خلني اجيب سلقان من عند خويي
ونقنص بها ونستانس مع بعض
وقالنا ابرك الساعات ابشر من يقومها لها
واول ماجينا القاع كانت تبشر بالخير ربيع طيب ما شاء الله وعشب ماله حد ولا حوله حلال قفر
وهذي صور للقاع اول ما جيناها

وبعدها انتشرنا وجاري البحث عن المزيونه وخواتها في القاع الطيبه
يكفيك تمشيه في العشب الطيب

ولا يوم صاح الصايح في الجهاز يابوعلي قرب تعال صور ترانا هدينا وتكفى عجل لا يفوتك المنظر والاحلى انها طلعت على السهل عجل بسرعه

واول ماوصلت صوب الربع ولا ني ما اشوف الا عجت الكلاب والارنب طايره مره ومسكره طبلونها مع القاع ومره تخلي في السماء من السبق اللي فيها

ياهي العبت فيهم لعبه

ياهي متمرسه في الروقان تروق روق عن الكلاب

نكمل معكم الرحله بكره ان شاء الله

الف شكر لكم

تحياتي

__________________

اشكرك اخي على التقرير الكامل فعلاً رائع




لاهنت....

تقرير رائع جدا

بارك الله فيك على النقل

مشكور على النقل الطيب والأطيب انت اخوي السرية

تقبل مروري

الـساطـع

دائمآ مبدع ومتميز بطرح المواضيع


وسلمت يداك ويعطيك العافية

وتقبل مرووووووري

يعطيك العافية على النقل
رحلة ممتعة جدا

[align=center]
شـكــ وبارك الله فيك ـــرا لك ... لك مني أجمل تحية .
[/align]

ماشاء الله على الجو العالمي
أمتعتنا وكاننا معك
وننتظر القادم من نفس الرحله



بارك الله فيك