الشاعر : فواز البريك الجميلي





على ما حصل تبقى لي اكبر من اللي صار

وتبقى مثل ما كنت وآنا على ما كنت


مدامك رفيقٍ جابته سكّة الاعذار

هلابك كثر ما شلت منك الخطا لا هنت


عيون التسامح لو تشوف الخطايا كثار

تشوفك بغير عيونك اللي تشوف بها انت


يقولون ضحكات الخطا للخطايا انذار

وانا دايم ليا جيت ابقولها هونت


يا شاطر ليا من صرت جازم على الانكار

تغيشم بها واقول لك يا غشيم احسنت


على ذمّة التأثير والذنب فيك ايثار

ليا اوحيت رعيان الابل هيجنو هيجنت


على قدر ما تملك من المرجله مقدار

تحفّظ ترى سر المراجل ليا من منت


امانات وميانات قولت يدك والنار

عليها النباهه واجبه لو عليها امّنت


يدور الكلام وصاحبي والحياه اسرار

على الخافيه عشت الخوافي ولا بيّنت


ولكن تبيها كاش من دون لفت انظار

ما يركض ورى اسرار الرجاجيل غير البنت