رديه بين الشاعرين :
الشاعر / خالد خلف الحنابجه الدوسري
و
الشاعر / عافت سعد مسيعيد الحفر الجميلي
كانوا زملاء دراسة وبينهم خوّه وتنافس على المراكز الاولى وبعد التخرج كل منهم مشى مع رزقه وفرقتهم الدنيا واشتاقوا لبعض وكانت بينهم الاخوه والصداقه التي ندر وجودها حاليا وارسل الشاعر : خالد الخلف هذه الابيات لصديقه الشاعر : عافت الأميّر
قصيدة الشاعر : خالد خلف الحنابجه الدوسري
سلام يامن له على الطيب مدهال
اعداد رعادن سرا في نويه.
نوه صدوق وبارقه يشعل اشعال
وأمطارها تروي الديار السنيه..
عقب البطا يامسندي كيف الأحوال
عساك يا عافت بعيشه هنيه..
مشتاق لك بالحيل ياطيب الفال
شوق الأصيل اللي يقدرخويه..
لامر ذكرك قمت أحييه بجلال
وأثني لك الترحيب واعطي التحيه..
حطيت لك في داخل القلب منزال
يحوي الغلا والطيب والمقدريه..
دافع غلا ماهي رساله بجوال
ولا قصيد اللي هدفه العطيه..
تقفي بنا الدنيا علا بني الأمال
ونبني وتهدمها الحياه الشقيه..
رد الشاعر : عافت سعد مسيعيد الحفر الجميلي
يا ابو خلف يامرحبا وصل و امال
فواح ريح عطورها نرجسيه
و يامرحبا ترحيبةٍ قدر و اجلال
مصيوغهٍ باغلا المعاني هديه
ترحيب منقاد على بدع الامثال
مقادمه ترزم بعرض برديه
همال وسميٍ بكور له ليال
حالوب ساحوبه به النافعيه
يدهج بها قفرٍ من سنين ما سال
و تورق به نبوت الفياض العذيه
شف النظر قفرٍ خلي من الازوال
تشبع به الذيدان قبل ضحويه
و تقادم الاطيار وسطه و تجتال
وتشوف فيها كل طيرٍ و أخيه
ما ينوصف بالذكر و الا بالاقوال
متساوي نبت السهل و الشغيه
و اهدي تحياتٍ لك سمان و اجزال
قدر و وفاء من حشمةٍ لك عليه
و ابشرك حالي تسرك و لا زال
في خوة رجالٍ على العز حيه
مرتاح بالدنيا و مبسوط بالمال
و النفس في كل الحلال مغذيه
لا تامن الدنيا بها اقفاي و اقبال
لابد ما يومٍ تجيك المنيه
نكسب من الدنيا شرف خوة رجال
و الا الحياه بعلم رب البريه
و اليا نشدني مثل شرواك بالحال
اعلمه بالبيّنه و الخفيه
اشفق على اللي مثل شرواك رجال
و لا احتاجني ياخذ ما حاشت يديه
مثلك نحطه بالمواقف على البال
و اصد عن كل الوجيه الرديه
انت الرصيد و مكسبك روس الاموال
للطيب سباق و يمينك نديه
ساس الشرف عز الفخر تاج الابطال
من روس قومٍ بالمواقف بليه
قوم لهم بالعز ساسٍ و مدخال
ان شوبشت بين القبايل حميه
قوم تنومسها بالاقوال الافعال
اليا اعتزوا بالعزوه الدوسريه
نعم الصديق اللي مواقيفه لحال
طيب و كرم.. هيبه و فزعه قويه
عندي سبب واضح من ظروف و إزمال
عن قصرت الرجلين روحه و جيه
و انا اعتذر كانه حصل مني اهمال
النفس من هم الدوام محديه