قصيدة الشاعر الكبير / فهيد الباطح الجميلي رحمه الله
بصاحب السمو الملكي الأمير / طلال بن عبدالعزيز آل سعود
ابديت ما كنّيت في خافي الحشا .... بيوتٍ لمجد الغانمين تقال
مهدي على اللي يكسب الجود والثنا .... بعمّي ولد عبدالعزيز طلال
طلال بن عبدالعزيز اخو نوره .... الحر الاشقر ماضي الافعال
مثل اهديب الشام يضرب به المثل .... يشيل لَونْ الحمول ثقال
سمح النبا جزل العطا طيّب القرى .... عريب النسب من بين عم وخال
نسل حاكمٍ ما جابت البيض مثله .... صميدحٍ تضرب به الامثال
نورٍ عن الظلما وسيفٍ على الخطا .... على الحق واساها بكل عدال
علّه لجنّاتٍ تداعج نهورها .... وجزاه ربي صالح الاعمال
خلّف لنا في موكب العز اسرة .... صناديد حكّامٍ دروع رجال
ندرى عواقبهم ويرجى نوالهم .... ثقالٍ مواقفهم هضاب وجبال
صخيّين للعاني كريمين بالعطا .... يديكم لها بالمعسرات نوال
احدٍ لو انّه يملك البر والبحر .... محال ما يقضي اللزوم محال
ان جاه معتازٍ من البعد عاني .... مديون وإلا يبي عبر الحال
لو صّيح الصيّاح ما يسمع الندا .... خلّف رجاه من الضريع حيال
والّا انتم هل العوجا للزّم القصى .... افعالكم بالغانمات طوال
ياما عطيتوا جايعٍ مستحقّه .... كما غيث وسمٍ من حقوق اخيال
يشرك بخيركم الضعيّف مع القوي .... بنداه يخضر كل وادٍ سال
هذي قدايمكم وهذي فعولكم .... ليا ضاقت الحيله على المحتال
يا سيّدي من شاف وجهك رجا السعد .... يا عمي ولد عبدالعزيز طلال
ما يدري الشبعان عن حال جايع .... تطوفه ايام وتفوت ليال
زبنت يمّك يوم ضاقت محايلي .... مالي معاش ولا وراي حلال
عسى والديك اللي تربّيت بينهم .... لهم بجنات النعيم ظلال
واختم قولي في صلاةٍ على النبي .... ولكم البقى يا طيبين الفال