ول يا قلبٍ قليل العرف طاوع شوره و استمع لاشواره
ما يطيع العذل اللي ينصحه و يسرّه ان نصحته زاري
تقل مستيسر اسير الاسره الماسوره ما تزول اكداره
كل ما يذكر كسافات الدهر و عبرّه اشتكى للباري
مولعٍ مغرم بحب الجادل الغندوره رادته و اخياره
راح في روحه معه و القلب مني جرّه قوةٍ و اجباري
عيني اللي ما تنام و كنها مسحوره في محبه جاره
هيكل ما له وجود و جسم مثل الدرّه مكسب للشاري
يوم ابرق به علامات الحلا منثوره ضحكته و انكاره
جاهلٍ تلعب له افلاك الهوا مفترّه يفتخر و يماري
مدةٍ لي طافت قريبٍ لي جميل الصوره ماقطفت اثماره
فات فوت الحرص وا نفس الخطا محترّه زاد جرحٍ باري
و الليالي فرقتنا و احتملنا جوره حكمةٍ جباره
و المحبه يا حبيبي و الحياة الحرّه في دروبه داري
يا حبيبي قوم ناخذ مع بعضنا دوره يا مدير الحاره
يا حرام شلون خلك تسهجه و تمرّه ما درا بالجاري
ان تمازحنا زعل و ارضاه ما له جوره ما يعرف الشاره
يا حبيبي من بهاذيلك حياتي مرّه دوك جسمي عاري
هو جميل و في جماله فاز باجمل دوره نظرته قهاره
كل ما قابل كشف لي كن لون الغرّه ضوح برقٍ ساري
عود خلي عود موزٍ ناعمٍ بزهوره بين خضر اشجاره
واهني من هو يشوفه بالشهر لو مرّه يقتضي و يثاري
حلو لذات الولع للعالم المسروره و الهوا تذكاره
في ليال ما احد يامن حوادث شرّه و الدجى سماري
يا حبيبي من دخل في خطةٍ مخطوره يفتهم مظهاره
و الجفا و ام الجفا خل الجفا بالمرّه لا يجي له طاري
سعد بن مسيعيد الحفر