قصيدة الشاعر الكبير / فهيد الباطح الجميلي رحمه الله
بصاحب السمو الملكي الأمير / عبدالله بن عبدالعزيز آل سعود رحمه الله
ولي العهد نائب رئيس مجلس الوزراء ووزير الحرس الوطني
مبداي بسم الله قبل كل ما اقول .... عالم سراير عبده اللي كتمها
محصي نفوسٍ رزقها منه مكفول .... اللي خلق عمي الدوابي رحمها
يبقيك يا اميرٍ به العطف مبذول .... نفسه كريمه خالقه ما ظلمها
عبدالله اللي له قدايم ومفعول .... يمناه تبذل مالها من كرمها
حاكم تسلسل من صناديد وزحول .... اهلك شيخان العرب من خدمها
انتم هل العوجا لكم فضل وفعول .... وابوك قبلك ساد نجد وحكمها
يزلزله يا جوهر الماس مزلول .... فضايلك ترجا وكلٍ فهمها
ان طق عود بعود والراي مفتول .... خشوم الرّجال الطايشات تخزمها
عنك الرّدى ممشاه حولٍ بثر حول .... وهبات تكسب كل نفسٍ سهمها
نادر حرارٍ ما انت بالفعل مجهول .... عشاه من صيد الحباري لحمها
ان طلّعوه بسهلةٍ ما بها زول .... ما قيل سرّاح الطوارف زحمها
شخّص وطالع وانحذف تقل مرسول .... وأدلا كما دلوٍ تقطّع وذمها
تزّبر اللي بينهم تقل مخيول .... وانقاد للي يتبعونك حرمها
يطلع على الخارم ليا لبّد الجول .... اللي ضربها بالمخالب قسمها
هذا يطيح وذاك بالرّوض مقتول .... وهذي تلجّا بالشجر من وحمها
هذا على وصفك برسمٍ ومفعول .... فيك الدّلايل واضحاتٍ علمها
يا علّ ابو متعب لنا دايمٍ طول .... ابو الضعوف اللي قصيرٍ قدمها
ياما عفيت الدّين كافل ومكفول .... باموال ما تحصي الكتابه قلمها
يا علّ سعوك عند مولاك مقبول .... في جاه من كل الفرايض ختمها