الشاعر : يوسف معطاب مسيعيد الحفر الجميلي
الله خلق روس الرجال وفرق رجلٍ عن رجل..
فرقٍ مثل فرق الذهب عن فضها ونحاسها..
اما مليٍّ بالعقل ولا مليٍّ بالجهل ..
والوقت يعطيك الخبر بارباحها وافلاسها..
العاقل. اللي يعجبك رايه بقولٍ او فعل ..
ساس الكرامه والحميه والمعزه ساسها..
تحصله وقت الشدايد قرم ويشيل الحمل..
بالطيب لك يسعى سعي والخيل هو فراسها..
ححتى ابن عمه لاتنخابه فزع مهما حصل..
من طيب راسه يصعد العليا ويشبي راسها..
اما الردي راع الفشايل ماتجمل وانهزل..
يبلشك بالنشدات والجلسه يزيد عماسها..
بالاوله طاح وفشل والثانيه طاح وفشل ..
يعمسك رايه والعرب تضيق منه انفاسها..
مير العرب ماتفقده سوا نزل ولا رحل ..
مايبغي الا ربعه اللي له تدق اجراسها..
والفرق بيّن واضحٍ فرق النمل عن الجمل..
مثل ماتفرق العرب مصلابها عن فاسها..
قصيدتي كتبتها ثمٍ ضربت بها مثل ..
لااهل العقول الزاكيه حيثه قويٍ باسها..
شاعر فحل صاغ المعاني جاذبه شاعر فحل ..
غاص البحور وجاب من سبع البحور الماسها..
وختامها اقول الصلاه على النبي خير الرسل..
محمد المبعوث سيد الخلق وافضل ناسها..