الشاعر الكبير : فهيد الباطح الجميلي رحمه الله
نطحني يابو عودة مثل خشف الريم بسط السّوق
يسل الروح برموقه لطرّاد الولع ذبّاح
على اوّل زمّته توّه غريرٍ عاتقه منتوق
تمزّع جيب ثوبه من نهودٍ كنّها التفاح
احواف القذلة الشقرا عن الخد العفر مفهوق
عبيطٍ فيلكيٍ ما تجيبه ضحكت المزّاح
ليا بادل الخطا يمشي حجوله يشتكن الضّوق
تواصيف الحلا والرّدف شطّ حويّر المصلاح
عليه قلادة اللولو يورّالي تحتها الطوق
تقاشط به شناشيل الذهب في مرتب المسباح
عطاه الله برسم الزّين تاخذ حقّها مطبوق
تغلّا لمّنْ رضّوها بقفل الزّين والمفتاح
وانا والله مالوم اللي عليها يلحقه ملحوق
يجاهد في سبيل الله لو دونه تفوت ارواح
رد عليه الشاعر الكبير : مسيعيد الحفر الجميلي على الشاعر الكبير : فهيد الباطح الجميلي رحمهم الله
صدق ما قلت به يا فهيد قولك يطرب العاشوق
تواصيفك لصاف الزين شايقني على ميلاح
ليا اعرض لك بوفق الفال واعرض للولع طاروق
تبيّح سدّك الخافي ولانت من العنا مرتاح
غويٍ بالجهل طارخ على خدّه ثلاث دقوق
نقاريش الصّعو خدّه صفاره خالطه ويضاح
ليا منّه تبلّج يا عضيدي بالثمان الفوق
تقول العنبر الهندي من الشاشه نسمها فاح
عيونه كنّها الساعات كاسيهن سواد الموق
تقول غزّيلٍ عن حسّ وحيان العرب منزاح
حسين الزّول زوله مثل نبتت ناعم الزملوق
وابوصّف تواصيفه يشادي نجمة المصباح
لا تشكي جرح قلبك وانت في طرد الهوى مسبوق
ترى انّ البيض قبلك عذبنّ البدو والفلّاح
وابوصّيك عن طرد المقفّي لا يجي لك عوق
ترى كل الطرب هو والولع يالقرم كلّه راح
انا قبلك تراني لامحٍ لي بالسّحاب بروق
وترى اللّي يتبع البرّاق مثل مطرّد الضحضاح
رد الشاعر الكبير : فهيد الباطح الجميلي على الشاعر الكبير : مسيعيد الحفر الجميلي رحمهم الله
الا يا راكب اللّي يوم تنحي كنّها الدانوق
عريضاتٍ مناكبها سنادٍ والمقاد شناح
ثمان سنين عفّوها ترتّع مع شليل النوق
تعصّت من حويلنّي ما عفتت مع الطيّاح
عليها واحدٍ عاني تنصّى واحدٍ ما ثوق
يجيب لك الخبر من رد علمٍ خاطره مفراح
قل انا يابو سعود اجهل بلذات النقا والبوق
افدني يالمجرّب واستفيد لكلمة المنصاح
غلط من قال تاويل الهوى فايت عليها حقوق
مجاله غبّتٍ خضرا يضيع بقيشها السبّاح
حراميٍ يبي الخزنه وهو في بدّته مسروق
يحسب الفود تهريبه وهو يمرح عليه امراح
انا استمثلت للوارد لمّن بانت علي فتوق
وتعرّض لي عماهيجٍ على رد السلام شحاح
يتسلسل ريقها الذابل مثل ذوب العسل بالذوق
ليا شفّيتها مشفي قبل نور الشفق ينباح
وطرد ما فات مثل اللي يبي المقفي بغير الحوق
يخصّه بالسهم حرصٍ على جدعه وهو ما طاح