قصيدة الشاعر الكبير / فهيد الباطح الجميلي رحمه الله
بمحافظ محافظة حفر الباطن / حسين بن مطلق ابن عادي رحمه الله
يالله ياللي لك تحج المصلين .... رجا النفوس برحمته وانتظاره
تعطي وتمنع يا ثقيل الميازين .... انت الغني والخير عندك مداره
ملكك يدوم وملك غيرك مهو شين .... عطفك لمكسور القوايم اجباره
تاسف لمن شاف الدهر له معاوين .... ولاله على ضيم الليالي شطاره
طار الكرى ما طبّق الجفن بالعين .... لمْن السفر للصبح بيّن حماره
وعبّرت لي من موجز الشعر بيتين .... وخذيت من زين الدلايل اخياره
ليا دق هاجوس الحشا قلت له وين .... يقول وقتي كامل العقل داره
جرد السنين توضّح الزّين والشّين .... وتذوق منهن الحلا والمراره
شفنا ولا حنّا عن الوقت ناسين .... بهذا الزمان اللي عرفنا غياره
تجمّعت سبع اللغه بالملايين .... من بين عبّاد الصنم والحجاره
ما ينعرف عقّيلها والمجانين .... جندٍ وفر يسبق عماره دماره
ناسٍ معوشتها من العسر بالدّين .... وناسٍ توّفّر مالها بالتجاره
الخير واجد بس دونه شياطين .... ياكل ضعيّفهم القوي باحتكاره
نركض وكنّا بالحتيفه مغيرين .... من طاح راح ومن نجح شب ناره
أْتلى طرات النفس يوم المقاطين .... قبل البداوة تنتسب للحضاره
يستانس الدّايج بوسط الدياوين .... بسوالفٍ ما بين مزح وعياره
اللي زمايلهم ظهور البعارين .... يبكي ليا منّه رحل عنه جاره
اعزاز النفوس اللي على الحق ماشين .... على النّقا راحو بعز وطهاره
ابرفع الشكوى لابن عادي حسين .... نمضّي من الوقت المطرّف نهاره
اغليه لنّه من رجالٍ قديمين .... يغدي النفوس مشاهده بالزياره
عشرٍ بشر طبعه على العسر واللين .... مثل الربيع اللي يونس خضاره
انا دريت وغيري الناس دارين .... لو ما يعرفونه تجيهم خباره
رجلٍ طلع من حظّكم يالدياحين .... يدع الفلاح بنبهته والبشاره
تحشم بحشمته الرّجال البعيدين .... واللي تسمّابه احشم من وقاره
ياليت جنسك يالمكمّل كثيرين .... اللي كسبت الغانمات بجباره
ان الرجال اشكال ماهم خفيين .... راس ووسط واحدٍ حياته خساره
لولا الفعايل ما عليهم نياشين .... زولٍ مثل غيره خذاله سماره
ما تفقده لو هو من الرّبع الادنين .... ليا قفّا على بعده تسوق البشاره
وختامها في طاعة الله على الدين .... واللي زرع زرعٍ حصد من بذاره
صلاة ربي عد ما شيف بالعين .... على النبي ومن هدى واستشاره