قصيدة الشاعر الكبير / فهيد الباطح الجميلي رحمه الله
بصاحب السمو الملكي الأمير / سلمان بن عبدالعزيز آل سعود
يالله يا والي على كل والي .... يالواحد اللي طالبك ما يخيبي
نمشي على امرك يا عزيز الجلالي .... وشيٍ بدون امرك نواله صعيبي
انك تعز ملوك نجد المدالي .... شيوخ الحرار اللي وحمهم رهيبي
اخوان نوره مكرمين السبالي .... فيهم ذرا للملتجي والغريبي
حكّامٍ اثقل من ثقيل الجبالي .... عز الصديق وكسر باس الحريبي
اللي يعاندهم وطته النعالي .... يطيب له وإلّا على غير طيبي
ويورّدون الماء قصير الحبالي .... وتشمل فضايلهم بعيد وقريبي
تفخر بسمعتهم لصعد المعالي .... حكّامنا اللي للنّدى تستجيبي
اللي شكا ضيم الدهر والليالي .... يزبن على اللي يجبرون الصويبي
ميزان حق ومنهجٍ للعدالي .... يعلّهم نورٍ لنا ما يغيبي
ادناك بدنا لا تعدّا الموالي .... حيث انهم من ساس جدٍ عريبي
ليا زبنته ما تجي منه خالي .... والّا الردي لو تمدحه ما يطيبي
شكيت لك يابو فهد عسر حالي .... والله على ما ذكرته رقيبي
راجعت ما جاني مرد لسؤالي .... مدري نسيت او المقصّر نصيبي
لا صرت انا مديون والبيت خالي .... ما هي لي السكته وانا ما دريبي
يا شيخ شوق مكمّلات الدلالي .... نجل العيون مغفّلات الصحيبي
ياجب على بيض العذارى الحيالي .... إلّا على مثلك تحمل وتجيبي
حنا ليا اونسنا من الوقت صالي .... انتم لنا من دون شكٍ وريبي
وانت الذّخر للاهل هم والعيالي .... والشايب اللي شاف عجز المشيبي
عبدالعزيز مطبّعك بالكمالي .... حماه ربي عن وقود اللهيبي
ويا علّ ابوك بجنةٍ له ظلالي .... وديد امك اللي به لهجت الحليبي
انا برجوى عطفك اول وتالي .... يابو فهد من كل خيرٍ قريبي