الشاعر : مخلد الغنيم
قالت: اكتب بالحبيب اللي تحب اعْيونه
قلت:هاك الشعر كلّه دفتره و اقْلامه
يا(قصيدة خاطري) في خاطري موزونه
ساقها قلبي من اسباب الغلا وهْيامه
والخفوق لْـيا تهيّض واستباح افنونه
والله ان احْلى القصيد يْفيض وقت الهامه
شاعرك يا بنت هدّ أفكاره المسجونة
والقلم يشره على سبابته وإبــهــــامه
كل ماتارد عليـه اهجوسه المجنونة
يوم حاربها ابْـليله وأعلن استسلامه
طَاوَلَه هذا السهاد المنزوي بجفونه
والخيال يْعود من مسرى الغلا باوهامه
وش بقى..والامنيات الماضية مدفونه
كم عزف حادي على صوت الامل وانغامه
شاعرك غنّى الحمام وجاوبه بلْحونه
ويتغنّى كل ما شاف الحِسِن قدّامــه
واثْـر حسنك كل مافيني يحارب دونه
كم قتيل الخد الايمن؟!كم قتيل الشّامه؟!
"يا ربيعيّة".."و ياحلوة ".."ويامزيونه"
ياخياليّة".." يازين الزين".." يارسّـامه "
(يا سكون الليل/ يوم الليل ينسى لونه)
وانتي القمرا( وهذا الليل انا مانامه )
ربّـعي في خافقي يالـدرّة المكنونة
واستحلّي قلب شاعر حاصرته ايّـامه
طوّل الله عمر حبّ ٍ ما اختلف مضمونه
والوفي رغـم المسافة ماتملّ اقدامه
عاشقك يابنت جعل الله يكون ابْعونه
أجمل احلامه معك..وانتي فتاة احلامه