بناءاً على طلب الاخ العزيز / خلف المهدي " ابو سلطان " تم ادراج هذه القصيده للشاعر / راضي الحيلي البناقي
يالله يامدير الهبايب بالارياح.
.................ياعالمٍ ماب الخفا والجهاري.
تاسف لقلبٍ كل ماقلت يرتاح.
............يطري عليه من الهواجيس طاري.
اسباب من بعيونه السود ذباح.
...............سيفه لمثلي لاضرب مايداري.
جامد عقل لاشك بالهرج مزاح.
...........ولياحكى لي تقل يعطي مصاري.
حبه زرع بالقلب من دون فلاح.
........وباقصى ضميري حط سوق تجاري.
الله بلاني به وانا قبل مرتاح.
.............لا واهني اللي مهو عنه داري.
ماحسب ان الحب يلحق بالارواح.
........ولاحسب ان تجري علي هالجواري.
عقب المعرفه كني الخبل لاساح.
.........والا السفيه اللي من العقل عاري.
امشي بغير شعور لاقعد ولا ارتاح.
...........والناس حطوا بي كثير المزاري
اول مفكر بالخساره والارباح.
..........واليوم معرف ايمني من يساري.
جيت الطبيب وقال بالكرسي ارتاح.
...........كشف علي وشاف كل المواري.
قلت اسالك بالله تعطيني الانصاح.
...........وتعلمن بالصدق ابالك اتداري.
قال انت لك قلبٍ عشوق ولماح.
..............متولعٍ مع لابسات الغزاري.
من همهن طول الليالي مايرتاح.
.......ومن حبهن به مثل ضرب الشباري.
لو هو مرض والله لاداويك بانصاح.
..............اما علاج حبوب والا بباري.
والحب مافاده طبيبٍ وجراح.
..........لو جاب لك مية دواء منت باري.
الحب مثل السل يلحق بالارواح.
...........وراعيه حاله مثل حال المكاري.
قلت اشهد انك صادقٍ منت مزاح.
...........هذا كلامك صدق مابه مزاري.
لاشك انا باسالك يوم الخفا باح.
..........علي من حب العذارى خطاري ؟.
قال انت كان انك شجاعٍ وسباح.
..............تطب غبات البحر ماتداري.
حب البنات بحور يقرا بالالواح
........ودروبهن قبلك على الناس جاري.
قلت اف انا معي شهادات سباح.
.......شهادتين اني على السبح ضاري.
بالليل اغيص بغبة الشط وارتاح.
..........واعود مايجري علي كل جاري.
مير البلا ان اللي نريده مهو صاح.
.........وانا على شوفه كثير الحساري.
والحال راحت مابقى كثر ماراح.
..........والجسم تومي هبوب الذواري.
لو هي تباع ان كان ابا اشريه وارتاح.
.................لا شك ماهي لاببيع ومشاري.
ولو هي غصب والله لاغير ارفع صياح.
..............لانخى من ربوعي واقول متثاري
لانخى من البناق شجعان وسلاح.
.................مية ولد مع كل واحد سواري.
اما تروح بسبة قيمة ارواح.
...............والا بعد ناخذ حبيبي جباري.
اللي ملك قلبي بقفلٍ ومفتاح.
.........حكمي ضعيف وحكم خلي وزاري.
ودي بشوفه كل عصرٍ ومصباح.
..........لاشك ان اهله مبغضيني جهاري.
كاني تركته صرت مثل الذي راح.
...........نكس من الحروه يقص الاثاري.
وكاني تبعته بين ذابح وذباح.
.........اما انذبح والا انجلي عن دياري.
قال اعرف الخيره خفيه والارباح.
.............خله يولي كان تتبع مشاري.
دور بداله يابن الاجواد وارتاح.
............الزين واجد والعذارى كثاري.
انا سمعت وطعت من هرج الانصاح.
.....وقمرا القمر ماجت على كيف ساري.
واشكر من ارشدني على درب الافلاح.
...............عد الكتاب وعد مقراه قاري.
والخاتمه يالله تبشر بالافراح.
..........فرحه تطفي بالحشاء ضو ناري.
غديني ادله وانتسي كل ماراح.
..........ويغيب عن قلبي هموم وطواري.