..حسن الختام..
آخر قصيدة للشاعر الكبير : فهيد بن باطح بن حمدان بن صايد العنيزاني الجميلي رحمه الله
الا يالله تحسن عاقبتنا
بصلاح اللي لنا واللي علينا
على الدّنيا طلعنا ما التفتنا
مٓنْعرف اللي بها واللي يجينا
خذينا سنين واجد غفلّتنا
ماكنّا بخدّها الطّاهر مشينا
على اللّين وقساها علّمتنا
عرفناها ونسينا اللي نسينا
قبل يوم المنازل جامعتنا
نعرف كبارنا والجاهلينا
مقادير الليالي فرّقتنا
فقدنا حيّنا والميّتينا
إليا من القدايم ذكّرتنا
صفقنا الكّف بالكّف وبكينا
خلص منّا الشّباب وعنه فتنا
دخلنا في زمان العاجزينا
نبي طول العمار وقنّعتنا
ورّتنا عجزنا منّا وفينا
والدّنيا بالمنايا ضامنتنا
مدامت للنّبي والمرسلينا
وتعطينا الامل وملاحقتنا
وبالغفلات بعنا واشترينا
تشوف اعمالنا ومراقبتنا
تدري عنّا وحنّا مادرينا
ياما ياما دلهنا ونستنا
فلكن من شقاها ما اكتفينا
وهي يابو فريح متابعتنا
ورانا يا عشير الغانمينا
نشوف اسبورها ماضايقتنا
وهي لابد تجي لو بعد حينا
تجي مرواح والّا صبّحتنا
على الميعاد بالعلم اليقينا
إليا قفّت بمانتها رمتنا
قضت منّا وحنّا ماقضينا
تفوت بدربها ما شاورتنا
نجي راضين والّا مارضينا
نخلّيها لناسٍ تابعتنا
بها يلقون مثل اللي لقينا
ولابد الملوك محاسبتنا
على المتن اليسار ومن يمينا
حشى لله ماهي ظالمتنا
تشوف افعالنا واللي نوينا
الا يالله تحسن خاتمتنا
ياقابل توبة اللي تايبينا
نروح بسبعة اذرع فايدتنا
من الدّنيا وما حاشت يدينا
كلينا ايّام وايّامٍ كلتنا
والملك لوجه رب العالمينا