الشاعر : سعيد المحطب
تقول عطني جديدك من غرام وغزل
واستيقظت كل فكرة من زمن نايمه
الشعر واحساسه المُتْعَب بغرفة عزل
وكل الاحاسيس عن زاد الشعر صايمه
سهم الشعر في حضورك يرتفع مانزل
يسهل على بايعه يصعب على سايمه
اعشقك والله كثر عشقي لطيب الجزل
اللي يمد السمان ودلته دايمه
واكره فراقك كثر كرهي لفعل الهزل
اللي على فعلته كل آدمي لايمه
وغلاك باقي على عرش الغلا لا يزل
متصدرٍ بالفؤاد واول القايمة
هذا هو اخر شعور من القصيد اختزل
مجمل احاسيس في صدر الغلا هايمه