يالله يارامي السحاب من الغيوم
يارازق اللي ماله احد يرتجيه
يامقوم اللي عاجزٍ يقدر يقوم
وترزق ضعيفٍ خلص اللي بي يديه
مهبول ياللي يرجي الميت يقوم
ومهبول ياللي يتبع اللي مايبيه
خطوات رجلٍ يرتجي بس الحلوم
يركض ورى شيٍ وهو صعبٍ عليه
العقل للعالم مثل لبس الهدوم
وبعض هدومٍ للرجل عيبٍ عليه
وكم واحدٍ رزقه كثيرٍومحروم
خيره كثير وخبزته تقصر عليه
يعلمك لاصرت تجهل بالسلوم
اكثرسلوم الناس مامرت عليه
يضبط عدد عد الدراهم والبهوم
ولو انت محتاجٍ ريالٍ لاتجيه
يسكت عن الحاجه لحين انك تقوم
وليا نشد يقول هذا ماعليه
يحسب اناللي بمخباته يدوم
لابد ميلات الدهر تقلب عليه
يبي يجي صقرٍ وهو مجناه بوم
يبي المراجل مير صعباتٍ عليه
لوهو عدل بالحمل مايقوى يقوم
سلم الرجال يجنبه غصبٍ عليه
هذا بعض وصفالهثايل والرخوم
طيح الولد طيبه قصرعن والديه
انا بلايه من مجمعة العلوم
يمسك لك الشينه ليا مرت عليه
قلبي مثل شنن يبس عقب السموم
عايس علومٍ قبل مامرت عليه
لأمسى يفكر بي عدد كل النجوم
يعد لين الصبح ضيعهن عليه
ليانامت العالم ماغيراقعد وقوم
امشي وأرد لمقعدي واقعد عليه
يازين مرقاب الضحى طيح الرجوم
لو رحت عنه الله علم لارجع عليه
بعض بيوت الشعر يشدن الوسوم
اكبردليل الوسم مشهودٍ عليه
مافيه حيٍ غير وجه الله يدوم
وسبحان خلاق الفلك واللي عليه
وسبحان من خلا الزمن ليله ويوم
اللي جميع ارزاق مخلوقٍ عليه
الناس من مبطي وهي صاحب وقوم
كلٍ يروح لدربه اللي هو يبيه
ياراكب اللي بالفضى قوطريحوم
قطع الخلا والدو مايشكل عليه
ابختم المعنى وسلم يالقروم صلو على المختار صلى الله عليه