رديه بيني وبين الشاعر الشيخ/ عبد الله سلمان ابن خلدا الحريجي ... شيخ قبيلة الحريج...



وانا ابتديت فيها وقلت؟



يـابـو تركـي مامشيت بـدرب الاّ لـه عـلامه
.......... عـارفه وابخص دروبـه يـاعشيري لا مشيته

اقـطـع دروبـي وادلّه لو نشئ غيم وظـلامه
.......... اسري بلـيـل وعينـي مـاتفارق من هويـتـه

صـورتـه مافـارقت عيني وحتـى في كـلامه
.......... مقدر اصبر يابو تركي طول عمري مانسيته

افـتـخـر فـي حـبـي الاول ولا فيـهــا مـلامـه
.......... حـب صـادق والمحبه شفتها بـاول ما جيتـه

حسنه اللي في جماله حط في خـده وسامه
.......... مقدر اوصف لك جماله ياصحيبي من بغـيتـه

واكتمل لامن تمشى صاحبي مثل الـحـمـامه
.......... مشيـهـا بـالهـون تـذبـح مـاتفنن عنـد بـيـتـه

الله اكــبـر واتـفـنـن واتـــغـــزّل فــي غــرامــه
.......... والله انـي قـلـتـها وبـصدق وبـروحي فـديتـه

راح عـنـي وابـتـعـد مقصـوده يـشـح بـسـلامه
.......... مـادرى بـالـحـب يــذبـح واعـذابي ماقـويـتـه

هذا خطي جاك واعرف من ذبحني في سهامه
.......... صـوبّ بقلبي سهام الحب وابـعـد مالـقـيـتـه

افـهـم ابـن حـريـج ياللي تعرف الشعر ونظـامـه
.......... عـارفك شاعر وفاهم يابو تركي وش هقيتـه

انـتـظـر رد الجــواب الـلـي يـحلـل لـي مـقـامـه
.......... واظـحـه مـعنى القصيده ردهـا لا من قـريتـه





رد الشاعر الشيخ: عبد الله سلمان ابن خلدا الحريجي.




يـالله المطلوب يـامنشي من القبله غمامه
.......... كـل وادي ممحلٍِ من غيثك النـاشي سـقـيـته

والمـثـايـل جت مثـل وردٍِ على راس العدامه
.......... حده الراعي على الماء من عقب ماهي مبيته

يوم شفت ابن حـريج من الهوى طول هيامه
.......... قلت لـه مـاجور هـذا الحب من قبلك شـكـيـته

والله انـك غـالـيٍِ عـندي ولــك قـدر وكـرامه
.......... مير يـابن حـريـج عن ماصار قبلك من نـهـيـتـه

انت جـوك صـافيٍِ واتقول لي ثـوّر عـسـامه
.......... لـيـه تـدخلني وانـا مـدري بـشـيٍِ ماجـنـيـتـه

امـس عـرضني طويق وحدني على تهـامه
.......... مير انـا لـي عـادةٍِ لا عجبني الـعـالـي رقـيـته

كـان حبك شوف عين ومعه نظره وابتسامه
.......... لا تـخـايـل في عيونك سيـل بـرقٍِ مـارعـيـته

الهوى تخضع لـه الاجيال واصحاب الـزعـامه
.......... والله انه سم يبري الحال واسهومه ممـيـتـه

واصل الطرقـه تـرى مـافيـه غـاره وانهزامه
.......... ان خـذاهـا عنك شين الحظ والاّانته خذيـتـه

ماعلى العاشق من اليا حب لبّاس العمامه
.......... لا طـرالـه يـاصلـه بـالليـل لـو مـاشب لـيـتـه

كان ربـك جابها والاّ عـسـى ماهي نـدامـه
.......... البني كـثـار والتـوفـيـق بـيـد اللـي رجـيـتـه