بسم الله الرحمن الرحيم
هذه القصيدة رد من الشاعر سعد بن مسيعيد الحفر الجميلي على الشاعر / مطر غانم الغنيم الجميلي
حي الجواب و حي من قال الأشعار
بالخط و اللي يّمنا يرسلونه
ترحيبٍ أحلى من لبن حص الأوبار
من در خلفات ٍ ليالي حتونه
من در بكرٍ رعيها عشب الأقفار
وقت الربيع حوارها يدرّجونه
وأحلى من الصافي على الكبد لا سار
ذوق و طعم صحة لمن يشربونه
لابو سعود أرسل سلامي بتكرار
قولوا عساه بخير ياللي تجونه
خصه مطر غانم من الربع الأخيار
طيّب و كفو الطيب و أنته زبونه
غالي و له عندي حشيمه و مقدار
لو هو نزح عنا ما نصلح بدونه
كبير سن و راس قوم لها أذكار
الطيب لو هو كايدٍ يقدرونه
له مجلسٍ تلقى به البن و بهار
وصينيةٍ فيها الشحم يجدعونه
جاك الخبر ياللي تبي رد الأخبار
ومنا مرد العلم ياللي تبونه
ساس البلاء شرذمةٍ تحرث النار
يبون تطفاته وهم يولعونه
عندي و عندك من يحبون الإنكار
وكل الحسد بقلوبهم يزرعونه
يا عل ما هم من طويلين الأعمار
اللي فعول الطيب ما يشكرونه
بعض العرب وقت الملازيم بوّار
يطلع خفيّه لو ضحك في سنونه
حلوٍ نباه وقلبه أنجس من الفار
همّاز لمّازٍ صديقه يخونه
مسرد كلام و بالسواليف هذار
و الناس مكنون الخبر يكشفونه
وإلا ترى الشجعان وافين الأشبار
عن الطمان نفوسهم يرفعونه
يابو سعود الوقت خاين وغدار
ما ينعرف وجهه وشكله و لونه
إن طاب لك يسقيك من زين الأثمار
وان شان وقتك ما تخايط طعونه
وان ضاق بالك سج رجلك بمسيار
يمّت رجالٍ خاطرك يفرحونه
ابعد عن الهزلاء و عميان الأبصار
و الهرثم اللي جارهم يجرحونه
دور رفيقٍ يحتفظ كتم الأسرار
عند الشدايد ما تخالف ظنونه
أبلج وله بالعرف منهج و معبار
قرمٍ عليه من المحلى نمونه
ابو محمد يا مطر راح بأقدار
ما شدّ عن داره ولا فيه رونه
عينه على ربعه تلفت بالأنظار
سترٍ على ربعه و ربعه يبونه
يمشي بمصلوحه مهو كسر تعبار
وكلٍ على كيفه يدرّج ظعونه
يوخذ عن الطيّب أليا غاب تذكار
وإلا أحدٍ لا غاب ما يفقدونه
رجلٍ بلا ربعٍ على الغبن صبار
و العود ما يذري بليا غصونه
قالوه قدامي عوارف و شعار
و أنا أذكر اللي قدمنا يذكرونه
ما لك مهونه عل تخطيك الأشرار
عسى كلامي يا مطر تقبلونه
و الخاتمة صلوا على سيد الأبرار
عد السحاب اللي تراهش مزونه