الشاعر / عبدالعزيز المحارب
عفنا الحفر روح على الجيب يامنيف
روح ترى من ضيقة الصدر .. عفناه
اركب وروح .. لاتحسب التكاليف
روح ولو .. راح العمر ما حسبناه
روح نبي حزم الجلاميد وطريف
عسا الكدر مع ضيقت البال ننساه
شاعر .. ويرقى نايفات المشاريف
عوايده .. والطيبه ساس مبداه
ماشح شعرن بالقصايد وهو ضيف
يقلط على جزل الفرايد .. وتزهاه
يامى دمح جور الخوي والصواديف
يصبر على جرح الرفاقه ويدراه
دنياك تمشي للهلايم .. ويا حيف
كم طيبن ماجت على الكيف دنياه
الناس يجفون الرجل كانه ضعيف
ويقدرون اللاش من شان مخباه
وين الخوي اللي ليااحتجت يمنيف
اللي لياجت .. حزة الضيق تلقاه
ووين القمر .. له عدت ايام ماشيف
عزي لمنهو لاعه البعد .. عزاااه
ليا طرت لي فيه .. هاك التواصيف
لا واعذابي منه .. لاحل طرياه
ذيك الليالي عشت انا أيامها ريف
ياحي مسرى لاتذكرت .. مسراه
من خفقت المرزم ومن كنة الصيف
وانا اتلمس جيته .. واتحراه
من غير شر ابطى ويلفي به الطيف
عسا مهو عقبه .. ولاهي ب فرقاه
قل للخلي .. خل السهر للمواليف
وقل للسهر .. ماتسهر العين لولاه
تفدا عيونه .. لابسات النفانيف
الغالي اللي كل .. مااغليت يفداه
إن غاب ضاقت بي من السيف للسيف
تضيق بي .. كل الوسيعه بلياه
ضاق الحفر روح على الجيب يامنيف
روح ترى من ضيقة الصدر عفناه
اركب وروح .. لاتحسب التكاليف
روح .. ولو راح العمر ما حسبناه