على وضح النقا نمشي وناخذ حقنا مضمون
ولانرضى المذلة دايمٍ نرقى على القمه

ويبقى علمنا غانم بإذن رب الملا والكون
ولو حاول يدنسه الردي بالكذب والنمه

ولا ننسب لنا فعلٍ يجي به شك وإلا ظنون
سند واضح يقوله ثبْت يجري الصدق في دمه

وإذا شفنا الخطا بيّن وبه ناسٍ غدوا يسعون
نقول الحق مانخشى به اللايم ولا نطمه

ولا تاخذ كلام اللي بتكذيب العرب مفتون
ولوك تكرمه لابد ما ينكر ولد عمه

ماهمه غير نفسه والعرب في نيته يدرون
سعى في مصلحة نفسه وهم الناس ما همه

يبين الحقد لو إنه بقى مدة وهو مدفون
وفرخ الحيّة الرقطا نقل في داخله سمه

ابشجب كل فعلٍ شابه لفعل الغبي شارون
نسى القايد صلاح وفعلته يوم أنقذ الأمه

غضب موسى ولكنه تحلى بالصبر هارون
حكيمٍ واحتوى الموقف وذكره بحليب أمه

قليل اللي يعرف الحق ويميز خطا المجنون
وكثير اللي بغى اليمّة ولكن ضيع اليمه

رجال بلا أمانة في زمانٍ ما أحْكمه قانون
يضيع الحق بالباطل وبعيون البشر غُمه

شتات نحاول إنا نجمعه والناس يختلفون
وراع النية السودا يشتت كل ما نلمه

ألا يالعاقل احذر من بليس المفتن الملعون
ترفّق بالعباد ولا تطاوع هافي الذمه

ترى مابه رديٍ غير من يرضى الردى والهون
ولا خير برجل يبدي طريق الحق ما يتمه

ما دام إنك على دربٍ صحيح وتعرف المضمون
توكل بالله وخل الحسود يبات في غمه

#خلف_المهدي