الشاعر الكبير / فهيد الباطح الجميلي
يا زين لذّات الولع والجهل شين ..... يوم الهوى ينقاد للمهتويني
عشقت يومن الهوى له قوانين ..... وشربت بحفوني بكلّ اليديني
واضرّ ما جاني من العشق ثنّتين ..... وحدة ترجويني ووحدة تبيني
القيض جامعنا واهلنا مقيمين ..... واشوفهن عندي بحرزٍ مكيني
غديت مثل حويّرٍ بين ضيرين ..... تقول ما مرن عليه السنيني
القيض فات وقالو النّاس نادين ... وانوو على المرحال عقب القطيني
تراودو بالرّاي ماهم مقيمين ..... بدوٍ على مرحالهم جازميني
الصّبح زاعن الضعاين مشيلين ..... ومن همّهم توّه تبيّح كنيني
مرحالهم عنّا جنوب متنحّين ..... والصّبح طاري ربعنا مشمليني
يبون للرّكعا ويمّت عثامين ..... سيلٍ على الوديان حط اليقيني
ياليتهم عن رايهم مستخيرين ..... لمّن يردّون الظما وارديني
ليا قلت هذا الرّاي قالوا معييّن ..... الذّاهبين قلوبهم ما تليني
ما منهم اللي قال بالشّور مخطين ..... هواي بيّن والعرب خابريني
يا بعدهم من عقب ماهم قريبين ..... يا مال فرقا العين للمنتويني
اتلفت روحي والعرب مستريحين ..... ولانا على شيّن من القادريني
اسهر لياما يدبحنّ الميازين ..... لمّن عمود الصّبح نوره يبيني
يطري علي افراق ضاف الدّليقين ..... وسرايرٍ يمضن بينه وبيني
عساك يا نفسي على الحق تهدين ..... الله دعاك المحكمة شارعيني
امّا ثبت حقّي عليك وتقرّين ..... والا ثبت حقّك وانا لك عويني
قبل احسب انك من فراقه تشاوين ..... واليوم صرتي لي عدوٍ مبيني
اللي قباله تستلذّين له وين ..... عزّي لحالك كيف تستانسيني
عقب الطّرب بفراقهم غصب ترضين ..... ياليت مكسبي السّلامه بحيني
قالت ادهورني بالانظار يا شين ..... واليوم تشمتبي مع الشامتيني
تبي تحاكمني وانا ما اطلبك دين ..... ولالك علي من الطّلبات ديني
بلاي من داف الحشا مغزل العين ..... اقسمت لك بالله فلاله وزيني
والله بثر والله ودينٍ بثر دين ..... ما انساه لوهم بالنّعش شايليني
يالذّاهبه دايم بهرجه تطرّين ..... صرتي عليه اشفق من ام الجنيني
سجّي ان كان انّك على الصّبر تقوين .... وعدّي رجاه بحسبة الميتيني
ترى المقدّر صايبك لو تشكّين ..... وسمر الليالي فرّقن الثنيني
قالت يلم شمولنا موفي الدّين ..... اللي يعين ويجبر الصابريني
ارجيه رجوى اللي ترّجى المغيبين ... وصيّور ما ايّام الليالي تزيني
ما اهبلك يا لايم قلوب المحبّين ..... بطرايقٍ مرّن على الاوليني