قصائد المسابقة الشعرية الأولى [الأرشيف] - ملتقى ومجالس قبيلة الجميل الهلالية ( الموقع الرسمي )

خلف المهدي

29-03-2010, 07:37 PM

بسم الله الرحمن الرحيم

أخواني الكرام أعضاء شبكة وملتقى ومجالس قبيلة الجميل الهلالية ( الموقع الرسمي )

السلام عليكم ورحمة الله وبركاته ... وبعد

هذه قصائد شعراء المسابقة الشعرية التي أقيمت في هذا الموقع الكريم ، وسيكون للجنة من تقييم القصائد ما نسبته ( 60 % ) وللأعضاء الكرام ما نسبته ( 40 % ) وذلك بالتصويت.

التصويت يسمح لجميع الأعضاء بحيث يكون لكل عضو صوت واحد ، فنرجوا من الأخوة التصويت للقصيدة التي يرى أنها قصيدة جزلة

كل شاعر أدرج قصيدتين واحدة مجاراة لأحد الشاعرين : قطيفان بن سلامة الجميلي ، دلول مطيلق الجميلي

بحيث وصلنا 10 شعراء ، ولك التصويت على المشاركات بحيث كل مشاركة تحتوي على قصيدتين لشاعر واحد

وللعلم فقد تم استبعاد بعض القصائد التي لم تنطبق عليها الشروط ، ونرجوا المعذرة لمن لم يحالفه الحظ في المشاركة

خلف المهدي

29-03-2010, 07:57 PM

المشاركة الأولى

الشاعر : منصور العاصي

أ) قصيدة المجاراة :

نويت أمثل ما طرالي من أبيات = من هاجس ما خاب فيها رجايه
ودي أعبر دام الأشواق حيات =كد قيل أخير من العلاج الوقايه
ما عاد باقي بالعمر كثر ما فات = لو البداية ما تجي كالنهايه
يا ما مشيت الدرب من دون مشهات =من عازةٍ زادت عناي بعنايه
ويا ما سهرت الليل والجفن ما بات = وازريت أميز خطوتي من قدايه
قلته وأنا اللي جرب الوقت بسكات = إمن التجارب ما خذيته كفايه
يا جاهل بالوقت هيهات هيهات =الوقت من يامنه بالعون تايه
ولا تنفع الرجال قولة حسافات= من لا قنع بالشور يقنع برايه
ترى الفتى سمعته تبقى ولو مات= مثل الهدف بعيون راع الرمايه
ولا فاتت الأفوات وش فود الأصوات =تبقى الحقيقة ... والدعايه دعايه
لاتحسب اللي فات يا صاحبي فات = احسب حسابك لو حكمت الولايه
وصل وصاتي وانت أوصيك بالذات = ما قل دل وزبدة الهرج غايه

-

ب) القصيدة الثانية

إن كان ما جتك الصداقة على الدين = خله يولي من تعذرك واقفى
ومن جاك بالحيلة وعايش بقلبين = تكشف لك الأيام ستر المخفى
الله على اللي كل ما قلت هالحين = إليا نخيته يا بليهان تكفى
قرم إليا منك نهضت الحجاجين =دايم فعوله طيبه ما تعفى
أبذكر اسمه وامدحه بالدواوين = مساعد اللي بالمواجيب كفى
ولا أصادق اللي باللوازم رديين= مامن حسوفه بالردي لو توفى

خلف المهدي

29-03-2010, 08:00 PM

المشاركة الثانية

الشاعر / سعدون البسام

أ) قصيدة المجاراة

يا الله يا محيي العظام الرميمات = يا اللي وضعت لكل نفس نهايه
طالبك لا ضاقت علي الوسيعات = واستغفرك وادعيك في كل آيه
وابدعت من جزل البيوت النظيفات = في كل شطر له مكان وولايه
شعر يجاري شعر من شاعر مات = اللي وضع في قمة الشعر رايه
يامل قلب به من الغبن حسرات = وليا هجع لحظة يبيح الخفايه
لو صاح بأعلى الصوت فوق الطويلات = ما ينفع المغبون عض الشفايه
على سنين من عنا العمر بالذات = راحت ولذات الليالي قفايه
ما عاد ترجع لو بذلت الصعيبات = والله يوفقنا دروب الهدايه
وانا تعبت وصار بالجسم كدمات = والعظم رق ولا لحقت لهوايه
والضعف هد الحيل في كل الأوقات = حتى عجزت أنقل بكتفي عبايه
ذي قدرة المولى بديع السموات = والعبد ما يدري متى الموت جايه

-

ب) القصيدة الثانية

أنا وجدي على جيب جديد وصنعة اليابان = جديد الصنع وأحدث من مديل العالم الغربي
على الريموت تشغيل السويك وفتحة البيبان = طلع في شاشة الانتر مميز شكله الذربي
طلع بإعلان لندن وأذهل المكسيك والرومان = على قمار الفضاء واللي مطلع صورته صربي
فخيم الصنع غطى بالفخامة صنعة الألمان = لهُ ديكور ساج وضوء ليزر يكشف الدربي
ونوع الجيب فكسارٍ تويوتا ما نبا النيسان = له سبيرين والعداد كنه جدول الضربي
جذبني لونه الأبيض وخطه كنه الثعبان = جميل الفن ومضبط تكانه عالم أوروبي
عليه اللي شراه ولا حسب للزود والنقصان = مرفه عيشته ما يعشق إلا الطير والخربي
ليا من دق ريموت المسجل شوّق الولهان = يهز الراس وهمومه تلافى كنها السربي
عذابه لا شتغل عزف الكبير الشاعر بنيان = سرح بافكار دافنها الزمن بالبعد والقربي
وعلى ذاك الغزال اللي جدعني جدعة النيشان = عرض لي بالطريق وعاقني من دون يشعربي
ملكني ملك كسرى يوم يملك بالجيوش إيران = سباني بالعيون وتاه عقلي يوم بحر بي
أسمى واتعوذ كل ما أشوفه من الشيطان = من الزين الحسين الصافي اللي خالقه ربي
أهوجس من طلوع الفجر به واحاول النسيان = أخاف ليا طرى نفسي تعاف الزاد والشربي
خجول الطبع مترف بالحياة مخصر رويان = أقادي به همومي وأتسائل كيف متربي

خلف المهدي

29-03-2010, 08:27 PM

المشاركة الثالثة

الشاعر / حسين السميان

أ) قصيدة المجاراة

بدعت من طرقي وجاريت الأبيات = والشعر له مبدا ولا له نهايه
منه التمني والرجا والحسافات = وفيه الجهالة والهوى والدرايه
وأبو ثميل بذكره الحي ما مات = مثايله تبقى للأمثال رايه
ولو التمني ينرجع فيه ما فات = إن كان نرجع بالعمر للبدايه
ولو بالتمني ... ما تضيق الوسيعات = ولا بكى جرحي بغيبة دوايه
ودرب الهوى ما بين ضحكة وضيقات = بالعمر هو سبة شقاي وعنايه
والرجل لا وصل السنين الأخيرات = يحمد ربه بالشكر والهدايه
يطلب عساه من الوجيه الرضيات = واللي مضى له بالعمر له كفايه
إليا مضى عمره بخير وسلامات = باقي حياته ما على العمر سايه
ما عاد تغريه الليالي بلذات = ولا هو بغرات الليالي بتايه
والله خلق دنيا ونار وجنات = وكل شي خلقه الله بحكمة وغايه
الوقت يضرس والعمر فيه لحظات = والأمر لله والبقى والولايه
عسى الخواتم يلبسن المسرات = والمقبلات يكفرن ما ورايه

ب) القصيدة الثانية

لو نام جفن من السهر للبال جفنٍ ما ينام = هواجس ودي بها وهجوس ما ودي بها
ما جفت عيونٍ جفاها الوصل واسقاها الهيام = ولا ظن نفس تهتني وظنونها تسريبها
الروح تضمى كل ما تروى من مزون الغرام = تعلها بروق المفارق والجفا يوميبها
الحب يبقى مثل ما يبقى مع الكف الوشام = كذبة ولكن المصيبة ما صدق تكذيبها
عواطف مثل العواصف والصواعق والغمام = تغير قلوب البشر غصب مهو من طيبها
أهل الهوى تشقى عذاب الحب وتحس انسجام = تنعم بناره وأطيب اللحظات في تعذيبها
عاشوا بغربة عن قناعتهم مع انفسهم خصام = والنفس مسكنها قناعتها ومنفى ريبها
أكبر مصايبها تجي بأسباب قل الاهتمام = كلمة توديها هناك وكلمتين تجيبها
تطرب لنسناس الحنان إن هب معسول الكلام = وإن مسّها الهجران عافت نفسها واللي بها
ما كنها إلا نصف فاقد نصف في حال انقسام = وكن الغلا لغزٍ لها والسر في تركيبها
أحدٍ يعيش الحب في نارٍ وأحد برد وسلام = وأحد تمره كل هالدنيا ولا يدريبها
الناس يفرق جنسها فرق الحلال من الحرام = ولا يبيّن فرقها إلا من بعد تجريبها
أحد يلام بزلته وأحد يزل ولا يلام = وأحد يخم السالفة وأحد معه يمشيبها
كم واحد مثل اللغم وانته تحسب إنه حزام = ناس هقيت بها ولكن هقوتك ما هيبها
ما يبكي إلا واحد نفسه عزيزة ما يضام = ولا يضحك إلا من بغى الذلة وهو راضيبها
دنياك تمشي عكس لو الناس تمشي بالنظام = دنيا كفى الله شرها محدٍ درى في غيبها
أحد ما قام ولا قعد وأحد بقلبي له مقام = الناس عندي في مكانتها وفي ترتيبها

خلف المهدي

29-03-2010, 08:33 PM

المشاركة الرابعة

الشاعر / سيف الثنيان

أ) قصيدة المجاراة

البارحة دمعي من العين هلي =هلت سحاب المزن لانثرت ماه
على عشيرن لانطحني يهلي = يضحك حجاجه قبل يضحك محياه
الياضحك في مبسم مسفهلي= يبري جروح بالضماير مخفاه
ابو ثمانن كالبرد مستهلي = والعود زملوقن من الوسم ساقاه
عوده ليانن مايلن ومتعلي= يلعبه الغربي على كل مشهاه
وجدي عليها وجد منهو مغلي= على عدوه راح ماعاد ينساه
يبيه مير انه جبن واستذلي= يخاف من حكم من الشيخ عداه
عليك ياللي مال وصفه محلي= كود القمر لابان نوره بمبداه
وعليك ياللي في هروجه يسلي=مثل العسل لاقالها من شفاياه
يتل قلبي مثل غربن اتلي = اليا سحبها وافي الزمل برشاه
هذا كلامي يوم اوصف لخلي= غرون غريرن تل قلبي من اقصاه
وصلاة ربي عد قوم تصلي = على نبي وضح الدين وانشاه

-

ب) القصيدة الثانية

ياراكب اللي جديد الصنع عجوبه =اهل النظر صنعة اليابان بهذلها
جيب على اول طرازه تو ماجوبه=احروفه اللاند وكروزر مكملها
منوة غريب تذكر شوف محبوبه=اليا تذكر عيون قام يكحـــــــــلها
يسري بليل من العشاق غنوبه= يقطع بعيدالمسافه ماتزامــــــلها
لاناض براق والبراق من صوبه= قامت عيونه مع الجامه تخايلها
جاه الرفيق القريب وقال مخطوبه= وزاده بقلبه همومن ماتحمــــلها
من قبل داله وجر القلب مسحوبه= يخاف من كلمة للزين قايلها
ثم فر فرت خطاة الورق مضروبه=ماصابها اللي رماها مير جفلها
ولاكل شاعر يجيب ابيات مصبوبه= احدن يكثربها واحدن يقلــــلها
والخاتمه ياعميلي يالله الـــــتوبه=اللي كفل رزقها بالموت كافلها

خلف المهدي

29-03-2010, 08:36 PM

المشاركة الخامسة

الشاعر / عبدالعزيز المحارب

أ) قصيدة المجاراة

في هـالـزمـن حـزن ومــواقف ولـــــــذات = رحـــلة طويـلة صـادقة في البـــــــدايه
لـــذة حـزن في خــاطري بعض الاوقـــات = هــــذي حقيقة ... ما اعتقــدها دعـــايه
حـبٍ ولكــن خـــالـــط الحب مــأســــــــات = وأنا اشهــد إنـك يا حـــزن فيــــــك آيه
بـعض المــــواقف تجـرح القـلب بسكــات = تدمــح .. تغـــاضى .. تعتـذر له كفــايه
إلى متـى قـلي عـــــلامـــك .. ســــلامـات = تسمـــع هل النمــات واهـل الوشـــايه
ساعـات أنا اصبر .. لكن الصبر سـاعـات = الصـــــــبر ينفــد ... ما تحمـــــــل أذايه
عنــدي قيــم عنــدي مبــادئ وعــــــادات =الذل ما ارضى .. لا .. ولا ارضى برايه
عـــزيـــز نفــس وللمشــاعر كرامــــــات = أمـــوت راســي ... ماتـذلــه اعـــــدايه
واذا سمـعـت وقـالـــوا فـــلان ذا مـــــات = دعـــــواك قلي .. يحســن الله عــــزايه
بالشـــعر اصـور ما حصـل من معانـــات = خطــــــــوة قصـــــيرة خاتمتها نهــــايه
فـكـــري بعيــدٍ وانظــــم البيــت باثبــــات = ما هي مقـــــالـه .. تنكــتب .. أو روايه
جــزل المعـــاني لي هقـــــاوي بعيــــدات = الشعـــــر يبني في قصيــــــدي ... ولايه
سهمي رفعته .. مارمي السهم صدفــات = أرمــي وانــا اللي عــــارفٍ للرمــــــايه
يـا رب ســامــحـني على كـل مـا فـــــات = وعســـــــاي دايـــم في طـريق الهــدايه

-

ب) القصيدة الثانية

هجـــرة غلانــا صـــادفتــها المقــاديــر = تعرضت باسبـاب ســـلم القرابـــة
وجـه الشبـه يا صـاحبي فيه تصـويـــر = اقـــرأ ســؤالي واستعــد للاجابــه
علامــته ياخــذ من الذهـــن تفكـــــــير = مالـه جــواب ولاحـلــول تشـابــه
ليه الزمــن مـــره حصــل فيـه تغـيير ؟ = وفيه الحصاني ما تهاب الذيابـــه
ما هو ترى قصدي تراك أنت لي غيـر = اسمك سموي حضرتك بالنيابــــه
لكــن على كل حــال من دون تبريـــــر = صديت عني ولا حسبت لحسابــه
ما سعفتني طــايح كســيرٍ وفي بيــــــر = ما خفت ربك ... ما قريت بكتابــه
لكـــن على كل حـــال ما دامـك بخيـــر = جرحي يهون وما بقى من إصابه
الوقت ما قصــــر ولا فيــك تقصــــــير = والصبر له غيمة وفيها سحابـــه
هانت ! وبــاقي داخـــل الصــدر تأثيـــر = بصمة غيابه والسبب هو غيابـه
أبنتـظــــر واكتب عن الحـــب تعبيـــــر = حبٍ بعيــــدٍ فيــه مـــاه وسرابــه
مشــــيت في دربه تقطـــــع بي السيــر =حــلفت والله لآ صــله عنــد بابــه
وإن كان ما شفتـــه ولا شفــت تقديــر = أمـا آخـــذه بالطــيب وإلا نهـابـــه

خلف المهدي

29-03-2010, 08:40 PM

المشاركة السادسة

الشاعر / ثنيان العوده

أ) قصيدة المجاراة

لو العمر يرجع على كل مافات= تمضي حياتي بين سوره واّيه
وقضي طوال الليل سجدن اوركعات =واطلب من الله واللتجي به كفايه
وزور بيت الله وعيد الزيارات= ومسجد نبيه ناصله بالنهايه
اخير من لسبت خوين بغفلات= وحطيت مابين الرفاقه وشايه
وابليس حاضر يلمزك بالقرابات =والمسعد اللي ماشين بالهدايه
وطبع الكرم بين الرجال الشكالات= سمات خير ويوصلك كل غايه
وترك القطيعه والا مور الرديات= ثم احسن المقصود عند البدايه
تفوز برضا الله عزيز البريات= ويعطيك من عنده احصون وحمايه
جاريت شاعر والمعاني جزيلات= صيته شهر باللمملكه له دعايه
انظم ابيوتّ من بحور ّغزيرات= اصوغ معنى البيت طبع وهوايه
احد عشر بيتّ على الاه والات= مترهين فيهن هذا منايه

-

ب) القصيدة الثانية

امس الضحى نطيت لي راس مرقاب= مشليدٍ .من فوق روس المراقيب
اجاذب الونات والدمع سكـــــــــاب= اشادي الورقى بعالي العياسيب
قم يانديبي وصل الخط معــــــطاب= الشاعر اللي فاهمن للمواجيب
قلـــه ترى حالي عجز عنه الاطباب= والقلب حارت به جميع الاطابيب
يكفخ كفيخ اللي على الجول نهاب =يبي يتمزع وقضبته المحاديب
على عشيرن صار له حول من غاب =ابوثمان مغلجاتٍ معاذيــــب
ابو ثليلٍ فوق الامتان ينســـــــــاب= اللي رموش العين سودٍ مهاديب
والله يلو إنه ضنى بعض الاجناب =لا اسطي عليها تالي الليل كالذيب
لا شك اداري خاطر اصحاب واقراب= حتى ان تصفى لي جمـــيع المشاريب
وارتاح من عقب العنا والتعذاب= وافوز في لاماه سيد الرعابيب
مرباه مابين العويثه مع انصاب= بفياض قيصومٍ مداهيلها النيب
ماسكنوها من ورى دفة الباب =ولا سمرو له غرفته والدواليب
مشيدٍين مروبعاتُ بالاطناب= ساسه عريب وسالم من العذاريب
ذباحة الخرفان مع كل ماطاب= اجواد و الله من خيارالمعــــــازيب
وفنجال بن مبهرٍ كنه خضاب= وسوالفٍ يطرب لها القلب ويطيب
فكــاكة المقفين لا حل الانشاب= فهود الزراج افعالهم به معاطيب
الله يفك صويحبي رب الارباب= ويخلصه من كل عود المطاليب
وصلاة ربي عد ماهل سحاب= على نبيٍ مرسله عالم الغيب

خلف المهدي

29-03-2010, 08:46 PM

المشاركة السابعة

الشاعر / خلف الطرفاوي

أ) قصيدة المجاراة

قطيـفان يارمز الشرف جزل الابيات=عـمـرت مـن زيـن الـمثايـل بـنـايه
تركتـلك في ساحة الشـعـر بـصـمـات=فيـها مـن ابـيـات الجـزالـه حـمايه
ابدعــت فــيـهـامن جـميـع الـمجالات=ولــيــتـهـا كــل اهــتـمـام وعـنايه
والـشعـر يـبـقى حي لـوصـاحبه مات=الله عـلـــم يــبــقـــى الـمـالا نهايه
قـولـن نـطـقـتـه صارلـك به عـلاقـات=لوكان ينـشرعن طــريـق الـروايه
كانه حـسن عـشرة اضـعافه حسانات=ويصيــر ذكره عن جـهـنـم وقـايه
كـانـه ذميـم وقـذف عرض ومـسـبات=منـه تـرى الـسـيه تـجازا بـسـايـه
الا ان قــبــل تــوبـتـه رب الـسماوات=وسـنـع مـسـيـره بعـد ما كـان تـايـه
يبـشـر بـعـــز وخـيـر تـقـفـاه خـيرات=جـاه الـفــرج مـن ربـنا والهـدايـه
هذي بياتن لــلــجــمـيــلــي مـجـارات=اللي جزل شعره وصـل كـل غايـه
شعره نـقـيـن عـن جـمـيع الـمخـمـات=من الان اسـويله اعـلان ودعـايـه
حيثه شريـف وقـال احـب الـشـريـفات=يبدو ترك رمزالـشرف له وصايه
كـذا احـسـبـه والله عـلـيـم الـحـسابات=واحــد ولـه بـعـمـال خـلـقه درايه
قــلــتــه ولا ازكــي عـلـى الله بـالـذات=مـخـلـوق واحـد مـنـزلـة فـيـه ايه
ولا ذكــر بـه فـي صـحـيـح الــروايات=حـديث ثابت عـن مـحـمـد كـفايه

-

ب) القصيدة الثانية

اذا الشعر في معنى ابياته يبي تفسيـر=مغلـف وجمهـوره يحـب الشفافيـه
يبي يستمع من شعرواضح بلا تفكيـر=لحتى يتفاعـل معـه بـردود فوريـه
اذانه جزيل المستمع رد فعلـه غيـر=تشـوّش جماهيـره جزالـة معانيـه
مثل من يشوش لفعل عنتروفعل الزير=انا اشوش مع سيرت ملوك السعوديـه
مواقف عظيمه جل تستاهـل التقديـر=رقو بالوطن والشعب نهضه حضاريه
على الدين ساروعهد كامل بلا تقصير=مشو في تطابيق الاحكـام السماويـه
حقيقه وجت من شاعر ٍ يحسن التعبير=يجيب الخبرموثوق ميـه علـى ميـه
ان كانك تريد الصدق مني خذ التبرير=تماثيـل متكـذب اخبـار الخلاويـه
وانا من قبيله بالمواقـف لهـا تاثيـر=جلت غصب بسباب الضروف المناخيه
فنتها الحروب وذلهاالبعد والتهجير=كـثـيـره مـعـاركـهـا مع جـيـوش تـركيه
من عيال غانم يوم ضاعو بشور مشير=بني زغـب فخـذن ينتمـي للهلاليـه
ابوزيد فارسهم غنيّ ٍِ عـن التذكيـر=يخيف الجموع اليا سمعوا ذكرطاريـه
وذياب ابن غانم في لقاه الخصوم تحير=قتل باللقـى فـارس كبـار الزناتيـه
بعدها تشتت شملهم ونتهـى التقريـر=ورجع من بقى منهم وصاروجلاويـه
مشوا بعدها نهجن مسالم ونالو خيـر=وعطو في ضمان السلم بالعـام ربيـه

خلف المهدي

29-03-2010, 08:51 PM

المشاركة الثامنة

الشاعر / خالد الغشم

أ) قصيدة المجاراة

يالله ياغافر ذنوبٍ وسيئـــــــات=مبداي بك مالي بغيرك بــدايــه
ياخالق للخلق جنه ولـــــذات=ارجوك ترحمنى وتغفر خطــايـه
نورك على كل الفلك والمــــجرات=كلن يسبح لـك ويسجـد لآيــه
علام مافى الارض ويا الســموات=رفيع فوق العرش يعلم خفـايـه
يامعطيٍ حسناك جـزل العطيــات =للـحق تـهديني وحسن النوايـه
يافارضٍ للعبد خمس الصـلوات =يـاعالم بالمستكن بحشــايـه
الطف بحالى ياعظيم المـقـامـــات =العـمر يمشى والقبور النهـايـه
ولا ينرجع شى على كل مافــــات =لو هي سنين ما ضيات ورايه

-

ب) القصيدة الثانية

بادي بالمعتلي منشا الخيالي =الله اللي منشي حس الرعودي
منبت الأشجار من مي زلالي =مخضر بالأرض زينات الرهودي
واتكلم في بيوت للرجالي =مدهل للضيف من سلم الجدودي
كايلي البن في زين الدلالي =ما حسب خسارتة عد النقودي
يا بيوت بنيت مثل الجبالي =للجميل اللي بنت قرب الحدودي
افتخر في طيبهم عز الرجالي=علمهم وصل الحجر وارض النفودي
يذبحون الحيل ما شحو ريالي=كلهم للطيب فخر اللي يزودي
حلودق نجورهم عصرالليالى=بالليال المعسرة فيها نجودي
لابتي لاصاربه قيل وقالي =مثل صفت جيش ضباط الجنودي
يحتمون الذود لاحل الجفالى=مابهم رجل خيوف ولا شرودى
واختمة فى زين عذبات المثالى=صاين قافى عن هروج الحسودي

خلف المهدي

29-03-2010, 08:56 PM

المشاركة التاسعة

الشاعر / غنمان الغانم

أ) قصيدة المجاراة

على نغم مسحوب جزلات الابيات = جاريت شايب في قديمه حكايه
شايب من المعنى يغوص المغبات = يروي على تالي سنينه روايه
وانا على القصه فتحت الملفات = باخذ من المظمون واكتب عطايه
والله لوان السنين القديمات = تعرف مقامه ماتحطه نهايه
من حن قلبه لليال الجميلات= اروى من الجزلات يابس ظمايه
لي حق افخربه واقول السمينات = شرواه يسكن في قصيده حشايه
عفيف قاف ولايجيب المطمات = دربه نقي ولاختلط بالردايه
مرحوم لوطاريه لليوم مامات =عساهـ في جنات رب البرايه

-

ب) القصيدة الثانية

طلبتك لاتودعني توكل واحتضن فرقاي=ترى مااصعب من الفرقاء سوى دمعات توديعك
لصرت اللي نويت تغيب عن عيني وعن دنياي=قسم مايبري جروحي حجم عذرك وترقيعك
ظميتك وانت في شوفك ينابيعن تصب الماي=قدر غيري لوانه مرتوي يشرب ينابيعك
عسى اللي فاز بك يقدر ينسيك الغلا وذكراي=لواني واثق ن قلبك على النسيان مايطيعك
عروسة من خذا اجمل حبيبه تستحل احشاي=ابارك له وبارك لك وبار ك له بتدليعك
نذر لاجيه بالقاعه وامد من الشقاء يمناي=وخلي مصافحة يده جنازة يــوم تشييــعك
حرام ازرع سنيني فيك واحصد للشقاء مسراي=وطاول دربي المظلم على نغمات تلويعك
ماراح من العمر اكثر كثير ولابقى بالجاي=سوى دمع القصيد اللي سقا مايه مرابيعك
فقدتك والمصيبه غصب فقدانك ماهو برضاي=شتات ولو بكيت العمر كله صعب تجميعك
طلبتك لاتودعني توكل واحتضن فرقاي=ترى مااصعب من الفرقاء سوى دمعات توديعك

خلف المهدي

29-03-2010, 08:58 PM

المشاركة العاشرة

الشاعر / سعود البسام

أ) قصيدة المجاراة

قطيفان هيضني على بدع الأبيات = الشاعر اللي حط للشعر رايه
أبنظم بيوت جزيلة صعيبات = واختار من نظم البيوت بهوايه
وأعطيك من بعض التجارب علامات = من شاعرٍ عاش الحياة بدرايه
يا من حياته توها بالبدايات = العمر يالجاهل ترى له نهايه
الطيب خير من الردى عشر مرات = والزرع ما ينبت بليا سقايه
وليا اجتمعنا جا لنا علم واثبات = هذا كلام الصدق ما به روايه
الدين خله دايم من المهمات = وصلاة ربي من عذابه وقايه
واختامها مني صلاة وتحيات = على النبي اللي بعث بالهدايه

-

ب) القصيدة الثانية

بادي بالله عدد ما نشا نو الخيال = وعد ما لاحت بروقٍ وحن من الرعد
يا مدبر بيض الأيام مع سود الليال = يا عليم بالخفيات ما غيره أحد
طالبك يا واحد جل وصفه بالكمال = حيث منهو يطلبك ما يخيب من السعد
تغفر ذنوبه وترحمه يا رب الجلال = وتنزله في جنة الخلد وتغفر له بعد
ذاك أبوي اللي مضرا على كسب الفعال = كاسب كل المراجل ويشهد من شهد
رحمة نرجيه من ربنا مرسي الجبال = الله المعبود نرجيه إلى يوم الوعد

خلف المهدي

29-03-2010, 09:10 PM

الآن التصويت مفتوح

فصوت لمن يستحق

صلاح المحارب

30-03-2010, 08:19 AM

شكرا لك أخي العزيز / خلف المهدي المحترم على هذه الجهود المبذولة ونتمنى لجميع الشعراء التوفيق

ملاحظة : رأيت في أحدى القصائد مغالطات تاريخيه ونحن نعتبرها وجهة نظر غير موفقه وتخالف الحقيقة......

الأمير

30-03-2010, 09:56 AM

بارك الله فيك اخي خلف المهدي على اهتمامك وجهدك لخدمة هذا المنتدى ...........وفقك الله والى امام

جمعه البناقي

30-03-2010, 10:19 AM

نشكرك اخي العزيز خلف على هذه الجهود الملوحظة ونسأل الله التوفيق للجميع

سعود البناقي

30-03-2010, 03:00 PM

بارك الله فيك اخي خلف على جهودك والى الامام
واتمنى للجميع التوفيق والسداد

فواز المطلق

30-03-2010, 03:58 PM

اشكرك اخي خلف المهدي على هذه الجهود المبذوله والاهتمام

الملموس لرقي هذا المنتدى الغالي..ونتمنى التووفيق للجميع

لاهنت......

زعيم الملتقى

30-03-2010, 05:19 PM

أشكر القائمين على المسابقة

ونتمنى للشعراء التوفيق

وتم التصويت

البلادي

30-03-2010, 09:10 PM

كل الشكر للقائمين على هذا الصرح واطروحاتهم الجميلة اتمنى التوفيق لجميع المشاركين......................................... ؛

ENGINEER

30-03-2010, 09:51 PM

بالتوفيق للجميع

مبدع يابو سلطان على هذا التنظيم وهذا الترتيب ودوما للأفضل

مسطور العيال

30-03-2010, 10:14 PM

السلام عليكم ورحمة الله وبركاته

ماشاء الله الكل قصايدهم حلوووه ولها معني جزله

واشكر الاداره على هذا المجهوود الرائع .

صوتي : القصيده الثامنه

اتمنى للجميع التوفيق والسداد

اخوكم

مسطور العيال

@ القناص @

30-03-2010, 10:47 PM

آلف ششكر للقآئمين على هذآ آلمسسآبقه آلرآقيه

وآلله يعطيكم آلعآفيه على آلجهد آللي بذلتوهـ لنجآح هذآ آلمنتدى

وآلله يوفق جميع آلمتسسآبقين وآلف مبروك للفآئز مقدمآ

تحيتي لكم جميعآ

الزعيم

31-03-2010, 12:04 AM

بسم الله الرحمن الرحيم

السلام عليكم ورحمة الله وبركاته

مساكم / صباحكم خير وسرور

ادارهـ مراقبين مشرفين اعضاء زوار

يسعدني ويشرفني الانظمام لمنتداكم العامر

واحب ان اشكر الاخ القدير خلف المهدي على البادرهـ والتحفيز للاعضاء

كما اشكر القائمين على المسابقه الجميله الاخ الامير ابو عبد الرحمن والاخ جمعه البناقي والاخ القناص

على جهودهم المتواصل في نجاح الصرح الراقي وعذرًا للبقيه لم تحضرني اسماء

القصائد كلها رائعه والقصيدهـ الاقرب للمجاراهـ تم التصويت عليها بكل امانه

نجتمع لنرتقي

اجمل وارق تحيه للجميع

الــزعــيم

البادي

31-03-2010, 01:29 AM

ياهلا ومرحبا شرفتنا بطلتك البيت بيتك يالغاليييييييييييييييييييييي

ماجدعوادالسعدي

31-03-2010, 03:53 AM

ألف شكر

للقائمين على هذه المسابقة الرائعة
ويعطيكم العافية على الجهد المبذول
للرقي بهذا المنتدى الغالي على قلوبنا
وإن شاء الله إلى القمم,,

ونتمنى لكم التوفيق,,

(تم التصويت للقصيدة الثالثة ويعلم الله لاأعرف صاحبها مع العلم كل القصائد جميله)

تحياتي وتقديري

عبد الله الجميلي

31-03-2010, 01:13 PM

مشكور يآبو سلطآن ع ـلى هذآ آلآنج ـآأز

بن منيجل

31-03-2010, 01:40 PM

الف الف شكر للاخ خلف على الاهتمام الرائعة

والعين السااهرة على هذه المسابقة

والى الاامام ان شاء الله

وصوتي: للقصيدة السادسة

نايف بن دهيم

01-04-2010, 02:17 AM

السلام عليكم ورحمة الله وبركاتة

اسعد الله صباحكم

اشكركم على ماتبذلونه من جهد جبار

تم التصويت للقصيدة (( التاسعة))

واتمنى للشاعر التوفيق ولجميع المشاركين ايضاً

خلف حمد الطرفاوي

01-04-2010, 04:38 PM

الاخ العزيزصلاح المحارب السلام عليكم ورحمة الله وبركاته امابعد اخي بالنسبه للقصيده اللتي قلت انها تغالط التاريخ اول شي لازم ترد على المنتديات فاكثير من منتديات عيال غانم نسبت الى بني هلال وبالتحديد الى ذياب ابن غانم ثانياً بنسبه لا التاريخ اللذي تكلم عنه ماعنده اي اثبات يثبت ان بني هلال عاشو على هذه الارض بينما قصص الاجداد والاباْ تثنت حقيقه قاطعه على وجودهم فعلاُ من خلال قصصهم وشعارهم بينما التاريخ يوم قريت بعضه وحتى المسلسل الذي عرض عن بني هلال عاري من الصحه الافي بعض الاسما المشهوره فاقبيلتنا تعرف الكثير عنهم ممايعني ان في صله ثابته بين بني هلال وقبيلتنا عيال غانم والا كيف طلع مسما عيال غانم وانا سامع بعض القبايل الثانيه يسمونا بعيال غانم لذا اقول والله اعلم ان هذه الحقيقه صادقه والا وش الفايده من تمسك اجدادنا واباً نا بهذه القصه العجيبه وفي ناس قالو انها خياليه مادري اذا كان واحد يقص مثل هذه القصص العجيبه ويقصد مثل هذه الاشعار الجزله وينسبها لغيره فهذي لاتصدق بل هذه الخيال بعينه فالقصه واقعيه نحن منهم لاغرابه انهم يخفون اصلهم خوفاً من كثرت طلاب الثار منهم رغم انهم ضعفو وحبو العيش بلاحروب وتخفو باسم ثاني ولحتى الان في ناس يقولون ياعيال غانم لذا مروجو منك يبن العم نشر مثل هذه الرد في المنتديات رغم مسماهم بهذه الاسم انا بامكاني انشره مثل مانشرت مقالك لاتنسى اني مشارك في المسابقه حتى لوبغيت ترد لازم تاْجل الرد بعد المسابقه فاملي بك غير ماقريت منك اخوك الواثق في حبكم له ارجو المعذره من الجميع لان الرد ضروري خصوصًا عندما الاخ صلاح لم يرد في رساله خاصه

بنت نجد

01-04-2010, 05:42 PM

تم التصويت للمشاركة الرابعه

ولكن اود المعرفة ما بعد التصويت

فما هي المكافئة للشاعر الحاصل على اللقب

ولكم مني كل الود والاحترام

خلف المهدي

01-04-2010, 08:49 PM

شكرًا للجميع

كما أرجو من الأخوة الكرام عدم الخروج عن صلب الموضوع والدخول في نقاش عقيم

ومن أراد النقاش حول المواضيع الخارجة عن التصويت فليتفضل إلى منتدى النقاش أو تأجيل الموضوع إلى نهاية التصويت

شاكر ومقدر لتفهم الموضوع سلفا.

مجد

01-04-2010, 09:24 PM

تم التصويت للمشاركة الخامسة

saad

01-04-2010, 09:57 PM

تستاهل القصيدة رقم 5 التصويت
وتم التصويت

المسافر

01-04-2010, 10:16 PM

السلام عليكم ورحمة الله وبركاته

تم التصويت للمشاركه الثانيه

جابرالمليح

02-04-2010, 02:30 AM

تم التصويت بحمد الله وشكرا لصاحب الفكره

المرقبي

02-04-2010, 11:31 AM

أشكر القائمين على المسابقة

ونتمنى للشعراء التوفيق

ولاكـــن ألاحظ / طب واضح على القصيده المجااراهـ

وتقليد للقصيدهـ...

يعطي الشعار ربي العافيه

(وتم التصويت)

تحيتي

غنمان الغانم

02-04-2010, 01:57 PM

الف مبروك على نجاح المسابقه

واتمنى من الاداره الموقره ان تضع شروط للتصويت مثال

ان لايحسب صوت من صوت وهو لايملك الا مشاركة تصويته

حتى نعطي كل حق حقه لابد من معاقبة من يدخل في 200 اميل وهوو شخص واحد او خمس اشخاص

قد يعتب علي البعض ولكن هذه هي الحقيقه

اتمنى للمنتدى وللاداره دوام التوفيق والنجااح

دمتم بالخير

ابن خليفه

02-04-2010, 07:34 PM

تم التصووويت

واشكر الادارة على هذه الجهود وانا اتفق مع اخي غنمان الغانم بنفس الرأي

ولكم مني كل الود والاحترام

خلف المهدي

02-04-2010, 09:09 PM

الف مبروك على نجاح المسابقه

واتمنى من الاداره الموقره ان تضع شروط للتصويت مثال

ان لايحسب صوت من صوت وهو لايملك الا مشاركة تصويته

دمتم بالخير

حياك الله يا شاعرنا الكبير غنمان

بالنسبة للتصويت فهو حق لكل عضو في المنتدى سواء كان حديث عهد بالمنتدى أم كان قديما وشروط المسابقة واضحة جدا

حتى نعطي كل حق حقه لابد من معاقبة من يدخل في 200 اميل وهوو شخص واحد او خمس اشخاص

ومن يثبت هذا الكلام ، ليس لنا عين تراقب جميع الأعضاء ، فالمنتدى وضع شرط التسجيل هو أن يكون الإيميل صحيح حيث لا بد من تفعيل العضو بعد تسجيله عن طريق إرسال رسالة إلى بريد العضو.

أما أن هناك شخص يحمل 200 إيميل فهذا أمر عجيب ! ، ولم يثبت

قد يعتب علي البعض ولكن هذه هي الحقيقه

اتمنى للمنتدى وللاداره دوام التوفيق والنجااح

وجهة نظر نحترمها ونقدرها

وبالتوفيق

ماجدعوادالسعدي

03-04-2010, 03:35 AM

لوكان لي مجال للتصويت مرات عده
أعطي صاحب القصيدة السابعه 100 صوت

والله إني ماقريت قصيدته الثانية غير المجاراة
إلا الآن صح لسااااااانه مليووووون
والله يوفقك ويوفق الجميع.

تحياتي

{ نبه القصيد }

03-04-2010, 04:31 AM

بالتوفيق لأطيب الأمنيات .....

والنجاح والأزدهار ...

المسابقه مفاجأه مبهره ....

وأحيي التنظيم والفكره .....

ونتوق للمشاركه في النسخه القادمه ......

إنشأالله تعالى ....

المرقبي

03-04-2010, 12:52 PM

(مــاجد عـــواد السعدي)

وش الموضوع ... كذا نغير أصواتنا ترى

تدري انك حبيب الملايين مايصير كذا نصوت للسابعه عشانك...!

هههههههههههههههه...هههههههههههههههههههه

تم التصويت سابقاً والله يرزق العبــــــــــــــاد

تحيتي

عبد الله الجميلي

03-04-2010, 01:27 PM

القصآئد كلهآ ج ـميله ...

وكلهم يستحقون التصويت

وتم الصويت

جمعه البناقي

03-04-2010, 01:49 PM

كان الله في عونك اخي خلف
كما احب ان انوه لكااااااااااافة الشعراااء المشاركين بان مثل هذه االامور لاتخفى على الادارة .. وامل منهم عدم الخوض بمثل هذه االامور لان القصائد امام الجميع وربما يسجل احد لانعرفه ولايعلم بالقصائد كأن يجد موضوع اعجبه .. ويرى التصويت ويصوت للقصيدة التي يراها مناسبة ومن ثم يذهب بلا رجعه .. لذا امل عدم الخروج عن فحوى المشاركات كما امل من المشاركين اعطااااء الاعضاء الاخرين فرصه للتصويت لمن يرونه يستحق وعدم لفت الانتبااه بمثل هذه التعليقااااات