ابشر يالبيطار بكره معك طالع

[غنمان الغانم]

لعيون البيطار ومن معه بطلع لو الدوام باكر



استلم ياصاحبي رغم اني لااعشق المحاوره

من شان ماتذكرون الشين باخلاقي -- بمشي معاكم واقط العذر واسبابه

بقط شغلي ورى واصير سواقي -- لعيون من يبخصون البر واعشابه

[فهيد البناقي]

ابشر بالرد ياغنمان الغانم:

دام البقا وانت لك بالحيل مشتاقي -- الجو ممطر وغيمه غر صبابه

انا هنا والبيوت جزال تنساقي -- نجيب ماجبت والطاروق ماهابه

[غنمان الغانم]

ياسلام استلم

ماطاب شعر الجزل لوماانت بناقي --- مايجهلك كود من ضاعت به اركابه

وانا معك ياخوي الخير بسباقي --- والذيب لامن عوى تعوي له ذيابه

[فهيد البناقي]

الله الله ماعليك زود استلم

شرواك كفو الشعر وتجيب مالاقي -- جزل القوافي رقيت بعالي هضابه

شد البيوت الجزيله لاح براقي -- ادخل على ماتبي والوضع متشابه

[غنمان الغانم]

اللله الله
استلم

وجه الشعر مايشيب بداخل اعماقي --- وسيم في فكرتي والراس من جابه

من صد يم الخطا يستاهل اطراقي --- الشين مايتعب الا الشين بنجابه

[فهيد البناقي]

الله الله استلم

حطيت فيها خطاء والدرب ماضاقي -- بيت الشعر مانهدم لاشدت اطنابه

نار الشعر تلتهب والله هو الواقي -- انا لها دام نار الحرب شبابه

[غنمان الغانم]

الله الله
استلم


من طاح دون السواحل وقت الاشراقي --- يخاف غوص المحيط ويلبس اثيابه

الموج احضنه فكر في صدر الاوراقي --- والاالغبي من جفافه مات بكتابه

[فهيد البناقي]

الله الله واستلم

ماطحت دون المحيط ولا انكسر ساقي -- ماهاب غوص المحيط ولا احسب احسابه

من طاح دونه صحيح يقال منعاقي -- ماطحت دون الهدف والملتقى ادرابه

[غنمان الغانم]

الله الله

استلم

ان قمت ولا قعدت العلم له باقي --- مركبك خفر السواحل سكرت بابه

رحلتك ماجاء وراها كود الارهاقي --- شوري عليك اعتزال القاف واصحابه

[فهيد البناقي]

الله الله استلم

خفر السواحل غفى بالنوم مافاقي -- مركبنا عدى مميز وين مغرابه

سعر الذهب ينعرف لاطب الاسواقي -- المبتدى والخبر معروف شعرابه

[خلف المهدي]

الله الله

صحت ألسنتكم

محاورة رائعة

[الدولار]

الله الله
صحت الالسن
محـأورة مميزه

[زعيم الملتقى]

محاورة مميزة

صحت ألسنتكم

وفقكم الله

[الداهية]

صحت الألسن

متابعين

[الأمير]

محاورة ممتعة وجميلة ... وفقكم الله